Промоција на „Крунски панагон“ од Горан Тренчовски
21 септември 2026
Издавачката куќа Антолог од Скопје со големо задоволство најавува:
Промоција на „Крунски панагон“
Ве известуваме дека во вторник на 22 септември, од 18 и 30 часот во книжарницата „Антолог“ , ќе се одржи промоција на збирката раскази „Крунски панагон“ на писателот и режисер Горан Тренчовски.
Промотор на книгата ќе биде Виолета Танчева – Златева, а фрагменти од расказите ќе чита актерот Нино Леви.
„Крунски панагон“ содржи 22 хибридни раскази, колку што има глави во „Апокалипсата“ и колку што има букви во хебрејската азбука.
Микрофикциите се напишани под влијание на светските велемајстори на пишаниот збор, како Бекет, Борхес, Кафка, Кено, Киш, Кортасар, Хармс, но сепак во нив се забележува уникатниот раскажувачки стил на авторот и возбудливата кинестетична атмосфера.
„Крунски панагон“ од Горан Тренчовски е дело во кое заедно ги сонуваме соништата на уметникот, собрани низ овие чудесни метафизички списи на неговиот творечки гениј, уметник кој се качува по пирамидите со својот несекојдневен талент, чекорејќи со своите стапалки во бескрајот и движејќи се на брановите на божественото, пливајќи во длабоките мистични води како поет/раскажувач, онаму каде што ние обичните луѓе немаме пристап, предочувајќи ни восхитувачки сцени од некои далечни и волшебни светови – вели Проф. д-р Мимоза Рајл во Поговорот на делото.
Горан Тренчовски дипломирал режија на Академијата во Нови Сад во 1991 година.
Режирал повеќе филмски, телевизиски и театарски проекти, а автор e на десетина книги со есеи и студии, меѓу кои: „Орбис пиктус“, „Поетика на (де)тронизацијата“, „Парс про тото“, „Кино неимар“, „Тези и аскези“ и „Живот во ролни“. Напишал две драми и неколку сценарија, а ја приредил и антологијата „Kинестетични раскази“.
Магистрирал и докторирал со теми за филмски адаптации и интермедијални верификации. Предавач и професионален соработник е во академски програми од областа на културата, уметноста и образованието. Основач и претседател е на филмскиот фестивал „Астерфест“.
Член е на Друштвото на писатели на Македонија и на Европската филмска академија. По добиената награда во Кардиф за играниот филм „Златна петорка“, живее и работи на релацијата Македонија – Велика Британија.
