Промоција на збирката раскази „Нека играат децата“
29 јули 2020, Скопје – Издавачката куќа „Антолог“ од Скопје со огромно задоволство ја најавува промоцијата на збирката раскази „Нека играат децата“ од младиот македонски автор Денис Бојаров. Промоцијата ќе се одржи на платото на МКЦ во четврток на 30 јули со почеток од 20 часот. На настанот ќе говори познатата македонска авторка Фросина Пармаковска, а дискусијата ќе ја модерира Софија Стојков, одговорна за ПР и маркетинг во тимот на „Антолог“.
„Нека играат децата“ е прва објавена книга на Денис Бојаров и претставува збирка раскази наменета за различни возрасни категории, која обработува социолошки, психолошки и филозофски теми поврзани со децата, со семејството, но и со човекот воопшто.
Во голема мера книгата изобилува со автобиографски приказни, збогатени со имагинативната нарација, преку кои авторот воспоставува комуникација и блискост со читателот и му испраќа емотивни и моќни пораки.
Еден од рецензентите на книгата, познатиот македонски писател Венко Андоновски, за првенчето на Бојаров вели дека е вешто и мајсторски напишано и со префинет стил. „Се работи за поучни раскази што носат многу силна порака и што ќе ви послужат да ги стоплите односите во семејството, ќе ја разбудат емпатијата во вас, ќе ве потсетат, научат и освестат за вашиот однос и внимание кон децата, животните и природата, ќе ви овозможат да доживеете душевен ораториум“, вели Андоновски.
Денис Бојаров е роден на 4 јуни 1987 година во Штип. Основното и средното образование ги завршува во Радовиш, а високото на Филолошкиот факултет „Блаже Конески“ во Скопје, на Катедрата за македонски јазик и јужнословенски јазици. Во последните петнаесетина години живее во Скопје и активно работи како преведувач од турски на македонски јазик и обратно во здружението „Румели Чичеклери – здружение за наука и култура – Скопје“, лектор е по македонски јазик, држи приватни часови по македонски на странци и е еден од авторите на Дигиталниот речник на македонскиот јазик.
Неговите писанија се ценети и високо вреднувани и од издавачките куќи во Македонија. Учествува на повеќе книжевни читања и е добитник на десет награди, меѓу кои Прва награда и трофеј за прво место за поетската творба „Афродита“ на литературната манифестација „Охридијада, 2018“; Прва награда за најдобра поетска творба под наслов „Љубовта е најубава“ на поетската манифестација „Гордана Коцева, 2019“; Награда за убав стил на пишување поезија на литературната манифестација „Охридски бисер на поезијата, 2019“ и диплома за најдобар расказ под наслов „Нека играат децата“ на меѓународната манифестација за литература, уметност и култура „Планетопија, 2019“.
Во согласност со препораките за организација на вакви настани, ќе бидат испочитувани сите мерки за држење растојание, носење маски и дезинфекција.
Добре дојдовте во светот на книгите, добре дојдовте во „Антолог“!
