Рецензија од прв читател: Бојана за „Сликата што не е на продажба“ од Агапи Гордон

 

Седиш до човекот со кој си толку долго во брак и одеднаш ништо не чувствуваш. Празнина. Отуѓеност. Осаменост. Кога ли се случи ова? Како?

Ова се првите зборови родени преку силни емоции, поттикнати од главните ликови Миа и Јан, кои ги доживеав кога почнав да ја читам оваа книга.

Една приказна за двајца сопатници, кои и би требало да бидат тоа за цел живот, но судбината, за тие што веруваат во неа, ги испреплетува нивните патишта, ги измешува нивните чувства и ги води кон тоа да се освестат за сè што изгубиле, а можеле да имаат, за сè што планирале, а не се остварило, за сè што оствариле, а само тоа им останало, како спомен, како сеќавање. Но, дали е доцна?

Солзи, премногу прашања испомешани во секојдневното лудило наречено живот, со сите негови текови, успони и падови, ги доведува Миа и Јан до различни животни предизвици.

Колку една одлука може да смени еден живот? И како ќе го промени?

Ова е книга која нема да сакате да ја оставите додека не ја прочитате до крај, бидејќи отсликува многу јака емоција, која веднаш се препознава.

Книга која топло ја препорачувам, бидејќи го опишува животот на реален и вистински начин, како и ризикот од тоа сè помалку да се биде вистински присутен во него и плодот на (не)заборавањето на неговите вредности.

 

Пишува: Бојана Дојчиновска