Рецензија од прв читател: Кристина за „Божиќ во големиот, блескав град“ од Мери Кеј Ендрјуз
Гринич Вилич,Њујорк. Најубавиот и најмагичниот период од годината. Добредојдовте на штандот за продажба на најсвежите божиќни елки на Толиверови кои без сомневање ќе го разубават сечиј дом.
А за да се осигураме дека вистинската елка е во наши раце, тука се Кери и Марфи. По ненадејниот срцев удар на нивниот татко Џок, Кери оваа година ќе му се придружи на нејзиниот брат како помошник во нивниот семеен бизнис. Прекрасна, млада и секогаш позитивна девојка која последниот период живее со нејзината мајка во Северна Каролина, откако поминува низ разделба со нејзиното поранешно момче и отказ од нејзината работа. Кери тргнува на пат, не само за испомош туку и со надеж дека ќе се пронајде повторно и самата себеси. Цел живот љубител на уметноста, и самата како уметник и доста креативна личност, ја искористува нејзината креативност во допринесување на семејниот бизнис со создавање на уникатни венци за на врата, изработени од нејзините вешти раце. И мора да признаам, едноставно сите жители во соседството ги обожаваат божиќните венци на Кери!
За разлика од Кери, нејзиниот брат Марфи е претставен како сосема спротивен лик, постојано во лошо расположение, многу бурни и непотребни реакции, Марфи воошто не се сложува со секоја постапка или одлука на Кери. Покрај ужасните услови за живеење во период од неколку недели во кам- приколката од 1982 година, уште таков цимер дефинитивно не е добра комбинација.
Но, добрата мисла не ја напушта Кери, сега кога во нејзиниот живот се придружува и Патрик заедно со неговиот 6 годишен син Остин.Да не ја заборавиме и Клаудија, сопственичката на ресторанот спроти паркот каде што е сместен штандот која што од првиот ден е тука и за двајцата членови на семејството Толиверови.Своето слободно време, заедно со Остин и таинствениот старец господин Хајнц, постепено тие ќе започнат со создавање на детска илустрирана книга, по приказни од бурната имагинација на Остин и вештите раце на Кери и господин Хајнц. Со текот на времето, едноставно не можеме да ја избегнеме и хемијата помеѓу Кери и Патрик. Дали Патрик е вистинскиот човек за Кери? Дали ќе ја завршат приказната и кој е таинствениот старец господин Хајнц, и најбитното, дали Кери ќе се пронајде себеси во големиот град, оставам да откриете сами откако ќе ја прочитате оваа магична книга.
Книга која ќе ги разбуди сите емоции во вас, радост,тага, сочуство, лутина, буквално се! Мери Кеј Ендрјуз навистина успеа да ни го долови најмагичниот период во Њујорк со нејзините описи,ни премногу ни премалку. Едноставно се си беше на место. Од секоја книга се добива некоја поука, а дефинитивно поуката од оваа книга е дека кога вистинките луѓе се покрај тебе, ти си најбогатиот човек на целиот свет. Таа поддршка и љубов и едноставно моментот што се тука покрај тебе во најубавите и најтешките моменти во твојот живот, едноставно ништо на светот не може да ги замени. Спремете го вашиот омилен пијалок и одвојте го денот да нурнете низ страниците на оваа книга,затоа што го заслужува вашето целосно внимание. Топла препорака од мене за престојниот период.
Пишува: Кристина Ристовска
