Кратки осврти од клубот на читатели за „Мутации“ од Франсис Кирпс

 

 

Билјана Димовски

 

 

“И потоа му падна како перде пред очи: собата веќе не беше искривена! Исчезнала не-еуклидовата геометрија. Со овие искривени сетилни органи перципираше само уште една гротескно редуцирана и поедноставена верзија на светот, изделкана и зрнеста. Наместо вообичаените единаесет основни бои, можеше да види само уште три. Немаше тука никаква заблуда, тој го гледаше светот низ очите на примитивен цицач.”

Очајот на мувата што сфаќа дека се разбудила како човек, перцепцијата на полжавот на ѕидот, седум одлични раскази! Еден вид на пародии на познати литературни творби, од Метаморфозата на Кафка, до Црвенкапа. Одлични! Малецки, наредени ко бонбончиња во кутија 🙂 И покрај тоа што искрено ме забавуваа со својата сатиричност, која многу ме потсеќа на онаа на Даглас Адамс, си имаат добра поента. Секој за себе.

Нека не ве збуни ако не ме разбравте многу, оти за да објаснам, ќе треба еден по еден да ги раскажам. Прочитајте ги, сѐ ќе ви биде јасно:)

Перица Илиевски

 

Дали некогаш сте помислиле како животните не гледаат нас луѓето? Што мислат тие за нас?
Мутации се приказни од една друга перспектива, за мувата што се буди преобразена во човек, за мечката која бега од зоолошката, за црвенкапа и волкот, но и многу повеќе.
Она што ми остави најмногу впечаток е тоа колку луѓето можат да бидат злобни и тоа како не мислат на она што се крие зад однесувањето на другите луѓе, туку веднаш осудуваат.