Рецензија од прв читател: Василка за „Кобајаши Мару“ од Анде Јанков

 

 

Како љубител на македонската писателска сцена, со нетрпение го очекував новото продолжение на авантурите на полицискиот инспектор Виктор Николов, при што ја имав таа чест да бидам прв читател пред тоа да биде објавено на пошироката читателска јавност.

Навикната на стилот на Анде Јанков кој постепено од година во година и со секој нов роман се подобруваше и сè повеќе созреваше како автор на крими-романи, неговото последно дело „Кобајаши Мару“ едноставно ме остави без зборови. Не само што го доведе до совршенство неговиот стил, туку и самата приказна ме наведе длабоко да размислам за целта на животот и да се запрашам дали секогаш го правам вистинскиот избор кога ќе се најдам на раскрсница каде што морам да одберам по кој пат ќе продолжам и дали сум спремна да се соочам со последиците од него.

Овој пат, Виктор ќе се најде во незавидна ситуација каде што и неговата фамилија ќе биде вклучена, во која ситуација ќе мора да одбере кој е најдобриот и најпаметен чекор при што последицата од истиот ќе биде најмалку болна. Старите пријатели и колеги повторно се појавуваат, но овој пат соочувајќи се многу поголема тежина која ја носат на својот грб. Во деловите каде што неговата фамилија се обидува да се справи со последиците и кризата со која сите ние се соочивме е толку добро прикажана што неминовно ме потсети на психолошката траума и изгубените души во годините кои поминаа.

Самата приказна е толку добро раскажана, што ме наведе со секој прочитана страница да се запрашам дали е ова дело е само фикција или навистина се има случено. Од самиот почеток, па сè до крајот вклучувајќи ја и кулминацијата на приказната, толку маестрално се вклопени, што читателот нема да почувствува кога дошол крајот и ќе го остави со чудно чувство исто како што и доброто вино остава трага откако ќе се испие и последната капка.

И повторно ќе се навратам на стилот на авторот: читателот или поточно љубителите на Ју Несбе и добрите стари класични трилери, ќе забележат големо влијание од нив во последниот роман „Кобајаши Мару“ од Анде Јанков. Неговото познавање на ситуацијата, литературната образованост, поврзаноста на темата/содржината со моралниот аргумент при тоа што самата приказна завршува со природен крај, само повеќе го потврдува моето мислење, а верувам и на идните читатели на ова дело дека Анде Јанков со неговиот последен роман може да се гордее и да се вклучи во групата на најдобри млади современи писатели во земјата. Дефинитивно «must read» роман со највисока можна оценка.

 

Пишува: Василка Хаџи-Панзова