Злото го прават обични луѓе – „Островот на пеликаните“ од Миодраг Мајиќ

 

 

Во издание на „Антолог“ наскоро од печат ќе излезе вториот роман на познатиот судија на белградскиот Апелационен суд и противник на казнениот популизам, Миодраг Мајиќ – „Островот на пеликаните“.

„Не постојат луѓе предодредени за добро или зло. Во одредени специфични и погодни околности луѓето го извлекуваат најлошото од себе. Тоа многу лесно се случува кога системот го бара тоа од нив.“ Ова го изјавува судијата Мајиќ, авторот на бестселерот „Деца на злото“.

Книгата, која е базирана на вистинит случај, дава повод повеќе за голем број дискусии и дилеми.

Приказната за љубовта на двајца млади Роми, Габриел и Ајша, може да стане сечија приказна, да се однесува на секого од нас. Оваа приказна е приказна за сите нас и немојте да се изненадите ако се препознаете во масата безимени и непознати луѓе во градот или во кое било место на светот.

Дали сте подготвени да дознаете како е да се биде човек што веќе од ништо не се плаши и кому му е сеедно дали по овој живот ќе стане дрво, камен или птица?

„Приказната за Ајша почнува на она место каде што почнуваат сите несреќни приказни. На раскрсницата на судбината, која нам, на кои ни е наклонета среќата, секогаш ни остава неколку насоки, ама за нив кутрите го чува само тој еден однапред предодреден пат.“