Јасна Котеска (1970, Скопје) е македонска писателка, филозоф и редовен професор по хуманистика на Универзитетот „Свети Кирил и Методиј“ во Скопје. Таа е авторка на единаесет книги за Зигмунд Фројд, Сорен Кјеркегор, комунизмот, санитарноста, објавени во Вашингтон, Торонто, Белград, Љубљана, Софија и Скопје, вклучувајќи ги Кјеркегор за конзумеризмот (2016, Торонто и Љубљана), Фројдовска читанка, рана психоанализа 1893-1899 (2013, Скопје) и Комунистичка интима (2008, Скопје; 2014, Вашингтон). Книгата Комунистичка интима (2014, Вашингтон) е избрана на т.н. Финеганова листа на 30 книги за 2015 година на Европското здружение на писатели (Берлин, Париз). Книгата Кјеркегор за конзумеризмот. Естетско, етичко и религиозно читање (2016, Торонто и Љубљана) во 2017 година ја доби државната награда „Гоце Делчев“ за извонредни остварувања од областа на науката од интерес за Република Македонија. Котеска објавила преку 200 академски студии во земјава и странство и во широк спектар на теми, вклучувајќи ги: интимноста, санитарноста, траумата, повторувањето, гестовите, родовите студии, како и студиите за 19-вековната филозофија и книжевност, некои од нив преведени на преку 12 јазици. Котеска е авторка на првата историја на македонското женско писмо од 1945-2000, книгата Македонско женско писмо. Теорија, историја и опис (Скопје, 2002). Таа работи како главен уредник на едицијата Collection Aut на Тринити Колеџот во Торонто и на Централно-европскиот истражувачки центар Сорен Кјеркегор (ЦЕРИ-СК) од Љубљана. Периодично пишува колумни и блог-постови за актуелните општествени прашања во земјава и странство. Котеска е член на Филозофското друштво на Македонија, Независните писатели на Македонија, како и на повеќе меѓународни организации и одбори. Таа е координатор на студиската група за образование за 2021-2023 во рамките на Нордиските летни универзитети. Заедно со д-р Илина Јакимовска е коуредник на книгата Етнологот како писател: писателот како етнолог (Скопје, 2020), а во моментов работи на два книжевни ракописи Фројдовска читанка 2. 1900-1901 и Кафка, хумористот.