Данко Плевник – публицист, новинар и геополитички аналитичар, е роден на 12 март 1951 г. во Карловац, каде што има завршено основно и средно образование. На Филозофскиот факултет во Загреб дипломирал на групата Југословенски јазици и литератури и филозофија (1976), а на Универзитетот во Загреб стана прв доктор на информациските науки во Хрватска (1986).

Се афирмира како колумнист на „Слободна Далмација“ од 1991 до 2016 г.

На пошироката јавност ѝ стана познат како гостин колумнист во загрепскиот неделник „Данас“ и во љубљанскиот дневен весник „Дело“.

Има пишувано за многу весници и неделници во регионот: „Вјесник“, „Ослобоѓење“, „Борба“, „Нин“, „Младина“, „Монитор“, „Нови лист“, „Приморске новице“, „Европски магазин“, „Република“ (Љубљана), „Глас Истре“, „Панорама“, „Око“, „Хрватска данас“, како и за европските и азиските весници: Frankfurter Rundschau, Wiener Zeitung, Il Piccolo, Courier internationale, Styx и Hindustan Times каде што ја имаше колумната „Zagreb Diary“.

Има објавено книги од високата и од меѓународната политика: Hrvatski obrat (1993), Smisao Bosne (1997), Novi Nato ili stara geopolitika (1999), Kaos hegemonije: koercitivna diplomacija međudržavnih i naddržavnih odnosa (2001), Rat i mir za Hrvatsku: zapisi 1991. – 1995. (2002), Hijerarhija međuovisnosti: kopni li primat Zapada nad idejom boljeg svijeta? (2011) и Geopolitika smisla života (2015).

Добитник е на наградата „Новинар на годината“ во Хрватска за 1991 и 1992 г. на Хрватското новинарско друштво. За публицистичкиот придонес за подоброто разбирање во Југоисточна Европа во Виена во 2006 г. ја има примено наградата „Dr. Erhard Busek“.