Влада Урошевиќ (1934, Скопје), поет, прозен автор, критичар, есеист, антологичар, преведувач. Поминал значаен дел од животот како професор на Филолошкиот факултет „Блаже Конески“, на Катедрата за општа и компаративна книжевност, држејќи курсеви по историја на европските литератури од XIX и XX век.

Почнувајќи од „Еден друг град“ (1959), објавил единаесет збирки поезија. Помеѓу неговите прозни дела има седум збирки раскази, седум романи, три книги записи и патописи, повеќе книги во кои се собрани критиките и есеите во кои зборува, главно, за македонските писатели. Објавил две книги за фантастиката во литературата, како и две книги за фантастиката во сликарството. Автор на поголем број антологии.

На македонски јазик ги препеал Ш. Бодлер, А. Рембо, Г. Аполинер, П. Елијар, А. Бретон, А. Мишо, Ж. Превер. За својот книжевен и преведувачки опус именуван е од Владата на Република Франција прво за витез на Редот на уметноста и литературата, а потоа и за офицер на тој Ред.

Книгите на Влада Урошевиќ се преведени на повеќе јазици: англиски, бугарски, германски, дански, италијански, полски, руски, словенечки, српски, француски, хрватски и шпански.

Во 2023 година, по наградите „Роман на годината“ и „Златен венец“ на Струшките вечери на поезијата, прогласен е од Македонската асоцијација на издавачи за „Автор на годината“.

Фото: Радмила Ванкоска