Нема производи.

Читаме заедно е-книги!

  /  #bookworm   /  Читаме заедно е-книги!

Читаме заедно е-книги!

 

 

Светската пандемија претставува време на промени. Тоа време му даде своевиден рестарт на светот. Корона-вирусот нè натера на големи промени во секојдневното функционирање и во начинот на живеење. Освен што нè врати назад во нашите домови, новиот вирус нè потсети дека сите ние во текот на еден ден, освен што имаме време предвидено за работа, имаме и слободно време што треба секојдневно да го посветиме на себе. Времето посветено на себе треба да биде посветено на најблиските луѓе, на омилената активност, односно на омиленото хоби. Некој сака да слуша музика од омилениот изведувач, друг е вљубен во филмови и серии, но најголемата љубов што сите ја негуваме е онаа љубов кон пишаниот збор, љубовта кон книгата.

Интересот за читање книги за време на пандемијата бележи постојан раст. Особено е забележан раст од близу 52 % на интересот за дигиталните изданија на книги. Овој податок ни покажува колку е голема желбата за читање дури и во време на пандемија. До овој податок е дојдено по спроведено истражување во близу 400 библиотеки и книжарници во САД, Канада и Европа. Истражувањето покажало дека, и покрај дозволеното физичко купување книги, читателите се одлучиле за купување електронски изданија. Забележан е пад на продажбата и издавањето на печатени и аудиоизданија, а забележан е порастот на продажбата на е-книгите.

Порастот на интересот за дигитални книги говори многу за желбата на читателите да прочитаат добра книга дури и во услови кога тоа е отежнато. Ова е одличен знак за сите издавачи, кои треба да ја разгледаат можноста за целосна или делумна дигитализација на своите изданија. Издавачката куќа „Антолог“ во 2018 година започна со дигитализирање на своите најпопуларни наслови, кои веќе во 2019 година се најдоа во понудата на првата македонска дигитална книжарница – Книготека. На платформата се достапни над 120 популарни дигитални наслови во издание на „Антолог“.

 

Доколку сте во потрага по нова книга што ќе го задржи вашето внимание, во продолжение ви носиме предлог-листа на наши популарни и интересни изданија објавени во рамките на проектот United we read! / Читаме заедно!:

Невидливиот чувар од Долорес Редондо – првата книга од „Бастанската трилогија“, преведена на повеќе од 20 јазици. Фасцинантна приказна во која тајните и легендите се испреплетуваат со ужасни злосторства.

Совршената дадилка од Лејла Слимани – возбудливо и храбро набљудувано истражување на моќта, класата, расата, семејството, мајчинството и лудилото. Роман добитник на наградата „Гонкур“ и светски бестселер со над 450 000 продадени примероци!

Клуб на обожаватели од Горан Трибусон – четири раскази во кои се раскажуваат неколку необични судбини, смешни и полни со пресврти, судбини за неколку веќе средовечни другари од приградската загрепска населба Плинара.

Куќата на џамијата од Кадер Абдолах – роман за богатството на иранската култура, суштината на исламот, уметноста, човековата природа, влијанието на радиото и телевизијата.

Воспитувањето девојки во Чешка од Михал Вивег – сатиричен приказ на чешкото посткомунистичко општество и првите тајкуни. Веројатно најуспешното дело на чешкиот автор кого го споредуваат со Ник Хорнби, кое има и своја филмска екранизација од 1997 година.

Во сенката на злосторот од Хелена Хеншен – силен и импресивен роман награден со наградата на читателите на списанието „Ви“ и со Наградата за литература на Европската Унија во 2009 година.

Двојно стакло од Халдора Тородсен – приказна раскажана без сентименталност, со цврст и полн стил, чија оригиналност со право се стекнува со Наградата за литература на Европската Унија во 2017 година и со престижната Исландска награда за литература за жени во 2016 година.

Голманката и морето од Марија Пар – долгоочекуваното продолжение на книгата за деца „Вафли во форма на срце“ од норвешката авторка што не залудно ја нарекуваат „новата Астрид Линдгрен“.

Ана од Николо Аманити – дистописки роман што фрла остра критика на корпоративниот глобализам што владее со светот и го потсетува човештвото дека наскоро ќе исчезне ако се остави на ова и не се спротивстави.

Промоцијата на е-книгите е во склоп на проектот UNITED WE READ!, реализиран со поддршка на програмата Креативна Европа на Европската Унија.

   

 

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.
    YouTube
    LinkedIn
    Share
    Instagram