Нема производи.

Дај 5 за Марта Димитров

  /  Дај пет за гости   /  Дај 5 за Марта Димитров

Дај 5 за Марта Димитров

 

 

Марта Димитров е родена на 17 февруари 1991 година во Кавадарци. Основното и средното образование ги завршува во родниот град, дипломира преведување по англиски и германски јазик на Филолошкиот факултет „Блаже Конески“ во Скопје, а е запишана на магистерски студии по меѓународен бизнис со странски јазици на Универзитетот ФОН. Пишувањето ѝ е страст од рана возраст, а реализирањето на нејзините прозни и поетски дела во печатена форма е остварување на нејзиниот сон. Добитник е на повеќе дипломи и благодарници за своите поетски остварувања. По дипломирањето интензивно пишува поезија на англиски јазик, која ја објавува на својот блог, а паралелно го пишува романот „Разголена душа“, кој го издава во 2018 година. Истата година, откако нејзината поезија е одлично примена од јавноста на друштвените мрежи, ја издава и стихозбирката „Мојот храм е внатре во мене“.

Годинава во издание на „Антолог“ излезе и нејзиниот втор роман – „Шардоне и шпагети карбонара“.

Во продолжение прочитајте кои наслови од „Антолог“ таа ги избра како свои фаворити.

 

„Големата магија“ – Елизабет Гилберт

Поднасловот „кретивен живот без страв“ укажува на нешто што го имаат сите ИСКРЕНИ уметници: страв од тоа дали ќе бидат препознаени и признаени од публиката. Ако сте писател, сликар, скулптор или каков било уметник, оваа книга е вистинскиот избор за да ги совладате тој страв и други стравови што ве спречуваат да заблескате во вашиот домен. Авторката, раскажувајќи за својот живот, ќе ви даде поддршка за она што го сонувате и ќе ве убеди дека секој ги има своите пет минути, само треба упорност, работа, трпение и, секако, чувство за сопствена вредност.

 

„Во вортексот на остварените желби“ – Ана Бучевиќ

Ова е книга што навлегува во „тајната на манифестирањето на желбите“ многу подлабоко. Нема да добиете само листа на мантри или афирмации што треба да ги кажувате наглас за да ви се остварат желбите. Авторката оди многу подлабоко – до онаму каде што се раѓа емоцијата. Емоцијата ја посочува како клучна за она што се манифестира околу нас. Проверено, нејзините техники функционираат, но само ако сме искрени со себе за нашата емотивна состојба.

 

 

„Двојно стакло“ – Халдора Тородсон

Раскажувајќи во сегашно време, авторката како да ни нуди да седнеме до неа на седиштето додека трае возењето, односно раскажувањето. Иако раскажува за љубовта во поодминатите години, тоа го прави без сентименталности. Одлично ја доловува самотијата, не преку описи, туку преку конкретните работи што ги извршува. Женска книга, која ѝ дава шанса на љубовта кога изгледа како сите бродови да тонат.

 

„Воспитувањето девојки во Чешка“ – Михал Вивег

Овој провокативен наслов провоцира да ја ставиме под прашалник проблематиката на романот и во нашиот живот. Имате ли ќерка? Дали сакате да имате ќерка? Од што најмногу би сакале да ја заштитите во светот во кој треба да живее? Љубовта често во нашето општество е до извесен момент табу-тема, особено кога станува збор за млада девојка, каква што е и Беата во романот. Како да ги совлада љубовните маки, што помага притоа, а што не, дали навистина клин со клин се избива и дали постои ризик да се скршне од патот кога една млада девојка е така повредена? Во секој случај, родителката присутност, љубов, трпение и разбирање се најдобриот лек за тие болки.

 

„Нека играат децата“ – Денис Бојаров

Уште со првиот расказ читателот е „навлечен“ на топлината што извира од редовите на оваа книга. Грев е да се прочита цела одеднаш затоа што има многу да се научи од неа, па добро би било да се густира голтка по голтка, расказ по расказ. Полна е мудрости и е блиска до обичниот човек. Нуди приказни и поуки блиски до современиот начин на живеење, кои истовремено ги потенцираат вредностите што се на раб на исчезнување во времето во кое живееме.

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.
    YouTube
    LinkedIn
    Share
    Instagram