Десет нови за саем

 

 

 

Во пресрет на Саемот на книгата, Антолог со гордост најавува десет нови наслови.

Секоја книга е избирана со многу љубов и внимание бидејќи приоритет ни беше во оваа 10-ка да бидат опфатени наслови што жанровски ќе ги задоволат различните читачки вкусови.

Убавата книга е секогаш добар избор, а во овие пандемични услови и најдобра заштита.
Ако се двоумите што да додадете на вашиот саемски список, нашите предлози се:

 

 Сфинга на гневот – Жарко Кујунџиски

Жарко Кујунџиски се враќа на македонската книжевна сцена со еден маестрален роман што се движи  на границите помеѓу мистеријата и книжевниот трилер. Покажувајќи го својот раскошен талент уште еднаш, Кујунџиски создава едно интригантно и вешто смислено дело, жанровски и стилски палимпсест со кој пристапува во досега неистражени предели на нашата проза.

Кога уредникот на издавачката куќа „Веда“ дознава дека еден познат писател е пријавен како исчезнат, тргнува да ја открие вистината. Потрагата во која ризикува сè ќе го соочи со загатки во кои се испреплетени историјата, митологијата, психологијата и општествените случувања. Лазар смета дека, ако ги дешифрира тајните пораки што ги открива, ќе ја оствари одамна посакуваната цел: да се добере до необјавениот ракопис на исчезнатиот писател.

 

Јуда – Амос Оз

Уште едно маестрално дело на Амоз Оз во кое доаѓаат до израз неговата генијалност и проучување на човечкиот ум со сите негови противречности. Романтичен и трогателен, ова е роман полн со меланхолија, но и хумор и мудрост, низ кој се испреплетени историјата и религијата.

Аворот на Приказната за љубовта и темнината и на уште четириесетина книги, во своето последно остварување Јуда, ни дава несекојдневен поглед на состојбата во Израел и на новозаветната приказна. Низ целиот роман се провлекуваат прашањата: Кој бил Јуда, дали бил предавник, а кој е Исус, дали тој бил христијанин или Евреин? Со или без Јуда, секој Евреин во очите на верниците и понатаму останува олицетворение на предавството.

Ова е еден од највлијателните романи на Оз, кој се има закитено со повеќе меѓународни награди и признанија.

 

 

Мистеријата на трите четвртини – Софи Хана

Третиот случај на легендарниот белгиски детектив Херкул Поаро е уште една ингениозно заплеткана мистерија што може да ја реши само неговиот генијален ум. Обожавателите на Агата Кристи ќе добијат уште една интелигентна детективска сложувалка што мајсторски ја плете нејзината наследничка Софи Хана.

Враќајќи се од ручек Херкул Поаро еден ден пред својот дом затекнува налутена и бесна жена. Инсистира Поаро да ѝ објасни зошто ѝ испратил писмо во кое ја обвинува за убиство на извесен Барнабас Панди, човек за кого таа ниту слушнала ниту го видела претходно.

Но ни Поаро нема чуено за такво лице, а уште помалку обвинил некого за неговото убиство. Видно вознемирен влегува дома, каде што го чека уште еден непознат посетител што исто така тврди дека утрово примил писмо со обвинение од Паоро за убиството на Барнабас Панди.

Зачуден и изненаден, Поаро се прашува уште колку такви писма се испратени во негово име. Кој и зошто ги испратил? И што е уште поважно, кој е Барнабас Панди и дали е навистина мртов?

 

Хотел Тишина – Ојдур Ава Олафсдотир

Овој роман ја доби Исландската награда за литература во 2016 година, а истата година издавачите го избраа и за најдобар исландски роман.

Јонас се чувствува како неговиот живот да завршил.

Сопругата го оставила, мајка му сè повеќе тоне во деменција, а неговата ќерка веќе не е истата. Така што, тој смислува сигурен план: да купи билет во еден правец до хаотичната земја опустошена од војна и да стави крај на сè.

Но, откако ќе пристигне во хотелот „Тишина“, тој сфаќа дека неговиот план – и неговата анонимност – започнуваат да се растопуваат под странското сонце.

Смешен, меланхоличен и крајно заводлив роман за еден човек чиј живот се распаѓа и процесот низ кој минува за повторно да го состави.

 

Шардоне и шпагети карбонара – Марта Димитров

Младата македонска авторка Марта Димитров во своето најново книжевно остварување нѐ пренесува во светот на Милан, Миа и Ксенија, испреплетувајќи ги нивните релации во своевиден љубовен триаголник. Но овој навидум љубовен роман сепак прави длабока психолошка опсервација на созревањето како процес што нема врска со годините, туку со себенадминувањето во обидот да се спречат егото и ароганцијата. Истовремено ова е роман и за истрајноста во борбата со себе и своите демони бидејќи, кога кршиме мразови, не треба никој да нè држи за рака затоа што се потребни двете раце и сета сила.

Марта Димитров одлично психолошки ги портертира ликовите доловувајќи ги нивните најдлабоки дилеми и стравови. Умешно проникнува во срцевината на нивните проблеми и раскажува една убава и топла приказна за љубовта, пријателството и лојалноста.

 

Скриени желби, немирни патувања – Владимир Јанковски

Скриени желби, немирни патувања е мозаичен роман во кој врз основната приказна за четири ликови се вкрстуваат приказните на педесетина луѓе од различни географски меридијани.

Книгата претставува микс од приказни, преплетени и вмрежени меѓу себе, доловени со многу детали, хаику-моменти, филмски секвенции, духовни епифании. Роман за интеракцијата меѓу личното и надворешното, за начинот на кој атмосферата и ситуациите ги обликуваат нашите внатрешни пејзажи, за потребата да се раскажуваат приказни и да се пронаоѓаат сјајот и лагата во нив.

Дека ова ќе биде ветувачко книжевно остварување на Јанковски говори и критиката. Оливера Ќорвезироска за најновиот роман на Владимир Јанковски напиша: „Во контекст на актуелната македонска продукција, со својот најнов роман, Јанковски го потврдува веќе освоеното место на различен во однос на тековните книжевни манири и пози; автентичен во однос на неговиот поширок книжевен интерес, свој и препознатлив глас во однос на сиот гргорлив шум на квалитетна романескна продукција последниве години.“

 

Остров – Меша Селимовиќ

Ова е прв превод на култниот роман „Остров“ на македонски јазик. Мајсторот на пишаниот збор и еден од најпознатите автори на југословенската книжевност, Меша Селимовиќ, е еден од оние великани чие творештво остава длабока трага. Топлината и непосредноста на неговите јунаци и чистотата на чувствата што извираат од страниците на неговите дела, раскажани со таква едноставност каква што може да постигне само врвен мајстор, погодуваат директно во срце и тука остануваат засекогаш.

Како живеам? Добро. Задоволен сум што проживеав веков, а никому не наштетив. Онаа штета што мене ми е нанесена одамна ја заборавив бидејќи загубата полесно се поднесува отколку каењето.

Куќата е на крајот од ’ртот, во ретката борова шума, на островот. Сосем близу до гробиштата, далеку од малата рибарска населба. Тука, недалеку од морето, блескаво лете, смрачено и сиво зиме, живеат тие двајца, со години, отповеќе многу години, можеа и да заборават сè што било, оти било одамна, ама немаат заборавено, осудени се на сеќавање.

Негови се: мрежата, чамецот, рибите, говорите, тагата и бесот, талкањето по островот.

Нејзини се: готвењето, чистењето, цвеќињата, кокошките, клавирот за кој сонува, трпението и тивкото сеќавање.

Тој ги мрази своите риби, и вели: Утре ќе јадеме кокошка за ручек. Таа е поразумна, вели: Поарно риба.

 

Стаклени сенки – Милчо Мисоски

Уште една книга поезија што е напишана со многу љубов за вистинско уживање и духовна храна не само за љубителите на стиховите туку и за сите книжевни сладокусци.

За поезијата на Мисоски велат дека не се чита брзо и лакомо, туку трпеливо и полека. Не се чита одеднаш, туку песна по песна. Нашата прекрасна поетеса Снежана Стојчевска препорачува „да прочитате по една песна на ден, но читајте ја наглас и повторете ја повеќе пати, како молитва меѓу две трепнувања, како мантра, лозинка за други димензии, како рецепт препишан од доктор.“

 

 

Одбивна среќа – Гиљермо Мартинес

Што би се случило ако погледнеме подалеку од видливото?

Неодолива збирка од 11 раскази со семејна, еротска, фантастична и хорор тематика. Гиљермо Мартинес балансира на работ помеѓу разумноста и лудилото, меѓу фаталноста и случајноста, меѓу соништата и кошмарите, нè запознава со духовната бездна на неговите ликови што се соочуваат со необични, дури и екстремни ситуации. Се појавуваат сладострасни професори и заводливи студентки, овенати барски дами и голобради заводници, сенилни и мрачни баби и уморни татковци, тенисери, болничари, имагинарни книжевни величини, криминалци и жртви, обичен свет.

Покажувајќи ги слепите точки во односите меѓу луѓето, Мартинес успева да нè стресе кога гледаме како она што ни е најсакано е на чекор да стане чудно, и како, во одредени околности, го допираме дното без да знаеме како сме стигнале дотаму.

Мартинес за оваа книгаја доби хиспаноамериканската награда за најдобар расказ „Габриел Гарсија Маркес“, а  наградениот расказ Мајка заштитничка е адаптиран во филмот Син во 2019 година во продукција на „Нетфликс“.

 

The Game – Алесандро Барико

Приказните од дигиталниот свет за авантуристички расположени момчиња и девојчиња е прекрасно илустрирана книга за деца и тинејџери што ни ја открива тајната на настанувањето на дигитализацијата, од самиот почеток до денес.

Книгата изобилува со извонредни графички решенија и прикази на мапи за дешифрирање и архипелази за истражувања, непознати острови и градови што постојано се менуваат, компјутерот диносаурус, видеоигри од 1980-тите, како и друштвени животни што ја населуваат мрежната рамнина и невидливи суштества што допрва треба да бидат измислени.

Оваа прекрасно илустрирана книга за деца и тинејџери не само што ја открива тајната на настанувањето на дигитализацијата туку несомнено отвора нови видици и пристапи во литературата за деца и млади и донесува вистинска свежина на полето на детските илустрации.

Со едноставен, дури и ироничен јазик, Барико ги води читателите во една уникатна и оригинална авантура низ историјата на дигиталниот свет.

Инаку, ова издание во Македонија ќе биде паралелно со светската премиера на книгата и изданијата низ светот.