Екранизацијата на романот „Авијатичарот“ оваа есен ќе биде достапна за публиката!
Култниот роман „Авијатичарот“ од рускиот автор Евгениј Водолазкин од оваа есен ќе биде достапен и во филмска верзија! Веста неодамна беше споделена со јавноста во Москва, на прес-конференција за самиот филм, каде беше прикажана и првата верзија од филмскиот трејлер.
Оваа филмска адаптација е еден од најочекуваните проекти во руската филмска продукција последните неколку години. На конференцијата која беше организирана од страна на „Интернационалниот Филмски Маркет“ и „Руски Филмски Бизнис“ авторот на романот и режисерот на филмот, Јегор Кончаловски зборуваа за работните процеси за филмот.
Иако веќе долго очекуван, веста дека проектот е конечно готов и има датум на објавување веднаш го привлече вниманието како на филмската и литературната критика, така и на верните читатели на авторот.
Делото „Авијатичарот“ е преведено на повеќе од 30 јазици и по својот голем интернационел успех, веднаш станало кандидат за филмска адаптација. Преговорите за истата започнале уште во 2016-тата, но филмот почнал да се снима дури во 2022-рата. Продукцијата на филмот е соработка помеѓу каналот „KINOTV“ и медијската куќа „Красни квадрат“. За дистрибуцијата на филмот е задолжена компанијата „Атмофера кино“.
Авторот, кој дирекнто учествувал во адаптацијата на романот бележи дека пишувањето на филмското сценарио станало „ново делче од самиот роман“. За адаптацијата, не била потребна само креативна работа, туку и храброст. За својот удел во адаптацијата Водолазкин истакнал: „Само авторот може вистински да уништи нешто во едно дело.“ За режисерот пак, главната задача и предизвик била да се преточат атмосферата и пулсот на романот, занемарувајќи ги временските определби во оригиналот.
Приказната во „Авијатичарот“ ја следи приказната на Инокетиј Петрович Платонов, кој се буди во болнички кревет и не се сеќава на ништо, дури ни на своето име. По предлог на својот лекар тој ќе започне да го запишува секој детаљ што ќе се врати во неговото сеќавање. Создавајќи една сложувалка од спомени, Инокетиј забележува дека неговите спомени изгледаат како да се од друго време, особено бидејќи на кутиите од лековите кои ги пие пишува дека е 1999 година.
Авторот позади делото, Евгениј Водолазкин е фасцинантен руски писател кој со своите дела ги освои срцата на читателите од целиот свет. Тој е добитник на наградата „Букстар“ во 2019 година, а за својот роман „Лавр“ ја добил наградата „Големата книга“ во 2013 година.
