Студентите од ТМФ за „Атомски навики“
Студентите од Технлошко-металуршкиот факултите при Универзитетот „Св. Кирил и Методиј“ во своето електронско студенстско списание „Списание на Тим – технолози и металурзи“ споделуваат што најмногу им оставило впечаток од делото „Атомски навики“ од Џејм Клир.
Еве што пишуваат студентите:
„Замисли да можеш да го подобриш својот живот само со мали, секојдневни чекори. Звучи премногу едноставно или дури невозможно? Тоа е токму она што Џејмс Клир го објаснува во неговата книга Атомски навики. Драматичните промени всушност не настануваат преку ноќ, туку се најчесто последица на мали промени кои кога се повторуваат постојано, доведуваат до огромни резултати. Според Клир, само 1% подобрување секој ден може да направи огромна разлика помеѓу успехот и неуспехот на подолг рок. Клучно е само да останеш упорен и да истраеш подолг период додека новата навика стане дел од твојата личност. Колку време е потребно за да се создаде нова навика? Некои велат 21 ден, други 30 дена а според некои, 66 дена.“
„Како и да е, времето ќе биде на ваша страна кога ќе ги следите само овие четири едноставни правила:
- Направи ја навиката видлива
Уреди ја својата работна средина така што ќе те потсети на навиката која сакаш да ја создадеш. На пример, ако сакаш да почнеш да читаш повеќе, остави ја книгата на твоето биро или покрај креветот. Тоа ќе биде сигналот кој ќе те потсети за твојата намера да читаш.
- Направи ја навиката привлечна
Здружи ја новата навика со нешто што ти е пријатно и што веќе го практикуваш. Ако сакаш да вежбаш, слушај ја твојата омилена музика додека тренираш.
- Направи ја навиката лесна
Почни со мали чекори. На пример, ако сакаш да почнеш да пишуваш дневник, започни со само две реченици на ден.
- Направи ја навиката задоволувачка
Слави ги твоите мали победи. Ако си ја исполнил својата цел за денес, награди се со нешто што те радува.”
„Ако пак сакаш да се ослободиш од лоша навика, направи ја одбивна, тешка или незадоволувачка. На пример, ако имаш проблеми со будење наутро, намести го алармот со музика или тон кој не го сакаш, или дури те иритира. Тоа сигурно брзо ќе те стане од кревет, па дури и натера да се будиш и пред самиот аларм. За разлика од другите експерти за навики кои те учат да се фокусираш на резултатите и целите, Атомски навики советува да се фокусираш на ПРОЦЕСОТ. Доколку уживаш во процесот, односно спроведувањето на навиката, резултатите сами ќе дојдат како логична последица. Без разлика дали сакаш да учиш подобро, да вежбаш повеќе или да станеш поорганизиран, Атомски навики е совршена книга за сите. Во неа ќе најдеш многу практични совети кои може веднаш да ги примениш. Најважно е тоа што ќе сфатиш дека не мора да бидеш совршен. Доволно е да се стремиш да бидеш само малку подобар секој ден.”
