Илја Леонард Фајфер повторно на македонски со „Гранд хотел ЕВРОПА“

 

 

Романот што постигна неверојатен книжевен успех во Холандија, книгата што веднаш по објавувањето во декември 2018 година достигна неверојатни 250 000 продадени примероци и речиси две години не се симна од листите на бестселери, „Гранд хотел Европа“ од популарниот холандски автор Илја Леонард Фајфер, наскоро излегува на македонски јазик.

Нараторот, разочаран од љубовта од Венеција, се сели во прекрасниот „Гранд хотел Европа“. Во хотелот во кој мириса на изгубена слава, авторот прави реконструкција на пропаднатата љубовна врска дружејќи се со ексцентричниот хотелски персонал и гостите.

Исто како и претходниот роман на Фајфер, „La Superba“, и во овој роман централни теми се туризмот и глобализацијата. Стилските варијации се мошне впечатливи: ликовите во хотелот разговараат на старомоден прозаичен начин, додека јазикот со кој се опишува љубовната врска со Клои е поетски и сензуален.

Покрај ексцентричниот денбрауновски сплет на мистерии и потрага по изгубената слика на Караваџо, во романот ќе се сретнете и со фантастични разгледници на Венеција, но и на Скопје растргнат меѓу различностите.

Ќе се почувствувате како да седите на трпеза во овој грандиозен хотел и ве служат со специјалитетот на куќата. А спроти вас седи авторот во костум по мерка и заедно се забавувате со гостите.

Роман за стариот континент во кој се насобрало толку многу историја што нема веќе место за иднината, па како најреална перспектива се нуди искористување на историјата во облик на туризам.