Интервју со Ана Ѓурова, најчитателка на 2022 во „Антолог“
1. Вторпат сте НАЈЧИТАТЕЛКА на годината на Антолог. Што значи тоа за вас и за вашиот однос кон оваа издавачка куќа?
A.Ѓ: Како голем љубител на пишаниот збор, тоа за мене е најголемото признание кое може да се добие. Да бидеш избрана за најчитателка и тоа по вторпат од иста издавачка куќа е неверојатно чувство. Самото тоа покажува дека „Антолог” се моја омилена издавачка куќа и дека ги обожавам авторите и книгите што ги преведуваат.
2. Која книга ја читате во моментов? Дали читате секојдневно или има денови кога едноставно нема време за книга?
А.Ѓ: Во моментов ја читам „Под двете сонца” од Огнен Спахиќ. Читам секојдневно, макар тоа да бидат и 20-30 стр. дневно. Денови кога нема време за книга се многу ретки, а ако во текот на денот прочитам макар и 5-10 стр. е добро.
3. Како одлучувате која книга да ја читате наредно?
А.Ѓ: Одлучувањето која книга да ја читам наредно ми е најтешко, бидејќи имам голем број непрочитани книги. Кога ќе дојде тој момент, може да поминам 5-10 мин. и да ги префаќам со ред книгите додека не се одлучам која да биде следна.
4. Дали може да ни кажете колку книги брои вашата домашна библиотека? Дали ги имате прочитано сите книги што ги поседувате? Дали од нив им позајмувате на пријателите?
А.Ѓ: Мојата домашна библиотека брои околу 600 книги. Иако би сакала, за жал не ми се сите книги прочитани. Не позајмувам книги, тие се моето богатство и сакам кога книгите се исти како првиот ден кога сум ги купила.
5. Кога би можеле да ѝ го сменете крајот на некоја книга, која би била таа книга и каков крај би ѝ напишале?
А.Ѓ: Искрено, како читател не би се осудила да ѝ го сменам крајот на никоја книга. Секој автор ја напишал книгата за да ни пренесе некаква порака, а крајот секогаш ја дефинира таа порака. Со менување на крајот, макар и во нашите мисли, ќе се изгуби смислата на пораката од авторот.
6. Дали некогаш сте посетиле некое место само поради тоа што сте читале за него во книга? Доколку да, кое е тоа место?
А.Ѓ: За жал не сум посетила некое место за коешто сум читала во книга. Книгата е сама по себе магична и авторот со своите описи нè пренесува на самото место на случување. Тоа е нешто волшебно кое само ние читателите можеме да го доживееме.
7. Сте се заљубиле ли во лик од книга? 🙂
А. Ѓ: Авторите некогаш толку реално ни ги претставуваат ликовите што мислиме дека ги гледаме пред нас, но да се заљубиме во нив можеме само платонски. За заљубување сепак треба нешто реално,опипливо, допирливо.
8. Како НАЈЧИТАТЕЛКА за 2022 година, кои книги во издание на „Антолог“ ќе им ги препорачате на читателите да ги прочитаат во 2023?
А.Ѓ: „Антолог” последниве неколку години наназад издаваат одлични книги што сум воодушевена, затоа и се најзастапени во мојата библиотека. Сите ми се посебни и драги што ми е тешко да издвојам неколку и да ги препорачам. Но, како најчитателка ќе пробам да препорачам навистина добри наслови кои вредат да се прочитаат: „Сечилиште” – Игор Штикс, „Обвинета” – Славенка Дракулиќ, „Гитара од палисандер” – Кристина Гавран, „Петтиот брод” – Моника Компаникова, „Островот на пеликаните” – Миодраг Мајиќ, „Секое утро патот до дома е сè подолг и подолг” – Фредрик Бакман, „Само бог простува” – Анде Јанков. Но, не се за пропуштање и книгите на Ирса Сигурдардотир, Софија Лундберј, Софи Хана, Долорес Редондо, Ахмет Умит и многу други. Изборот е многу голем бидејќи „Антолог” има одлични автори и добри книги за читање, која и да се одбере не може да се погреши.
