Ивана Божиновска, нов член на тимот на „Антолог“
Ивана Божиновска, позната по ФБ групата „Книжевна терапија“ и нов член на нашиот тим, избира пет омилени наслови во издание на „Антолог“.
„Човекот по име Уве“ – Фредрик Бакман
Прва прочитана книга од Бакман и знаев дека ќе биде љубов на прво читање. Па и на второ и на трето. Толку топла и пријатна книга не сум читала досега. Уве е лик! Јас тврдам дека сите имаме по еден Уве во животот. Низ што сѐ ќе помине Уве, оставам да видите сами. И секако ве предизвикувам да ги прочитате сите книги од Фредрик Бакман.
„Северната страна на срцето“ – Долорес Редондо
Тежок беше изборот меѓу четирите книги на Редондо. Сепак, се одлучив за оваа затоа што овде се запознав со детството на Амаја (која, патем, ја обожавам) и со почетоците на Амаја како член на тимот на Дипре. Редондо не пишува. Редондо везе. Амаја цврсто докажува дека е заслужено дел од екипата на единицата за истраги, која овој пат е во потрага по серискиот убиец наречен „композиторот“. Што сѐ се случува, оставам на вас да прочитате и да видите.
„Островот на пеликаните“ – Миодраг Мајиќ
Мајиќ ме освои со „Деца на злото“. Меѓутоа, конкретно мене „Островот на пеликаните“ ме воодушеви многу повеќе. Храброста на Мајиќ да пишува ме остави без зборови. Реков храброст затоа што е навистина потребна за да се напише сето ова што тој го има напишано во книгава. Да се изнесат на виделина сите неправди, корумпираноста и сето она што се случува во судството, па и во државата, зад затворени врати, богами, за мене е храброст. Тука морам да напомнам дека особено ми е драго што баш за оваа книга имав можност да продискутирам лично со Мајиќ, што уште повеќе ме воодушеви. Од мене најтопла препорака!
„Сигурен ризик“ – Анде Јанков
„Виенски гамбит“ почнав да ја читам со резерва. Не прашувајте ме зошто, не знам да одговорам. Откако ја прочитав, веднаш посегнав по „Сигурен ризик“, па верувајте, од тој момент Анде стана еден од моите омилени писатели. Во „Гамбитот“ ме извози низ Виена, а во „Сигурен ризик“ саглам ме прошета низ Скопје. Инспекторот Виктор полека ми се приврзува за срце. За љубителите на крими-трилери… Луѓе, не го пропуштајте Анде.
„Воздишката на Сузана“ – Јакуба Каталпа
Конкретно јас многу сакам да читам книги со тематика од Втората светска војна, холокаустот и логорите. Мислев дека сум се изначитала досега доволно, па нема веќе што многу да ме погоди, ама се излажав. Со денови воздивнував заедно со Сузана. Со денови имав кнедла во грлото. Единствениот „грев“ на Сузана е тоа што е родена како Еврејка. Сузана преживува хорор во Аушвиц. Но дали хоророт ќе заврши и како ќе заврши? Прочитајте. Ќе се каете ако не ја прочитате книгава.
