Како да изберете книга за подарок
Книгата е одличен подарок за празниците, особено оваа зима и овие новогодишни и божиќни празници, кога малку повеќе од обично сме принудени да ги поминеме дома. Иако времето поминато дома сметаме дека воопшто не е изгубено време, па иако оваа година моравме да се воздржиме од патувања и дружење со пријателите, можевме и сѐ уште можеме да се препуштиме на дружењето со книгата. Тогаш, ви предлагаме да изберете книга како подарок за најблиските и пријателите и, наместо лично да ги посетите и да им ги честитате празниците, испратете им ја топлината на честитката преку пратка со достава, која можете да ја направите на нашиот сајт.
Ние ќе ви помогнеме во изборот!
За љубителите на трилери
„Патувам сама“ на Самуел Бјорг
Ова е комплексен, софистициран и застрашувачки трилер, кој нема да престане да ве шокира и изненадува до последната страница.
Истражителката Миа Кригер ја напушта полицијата и градскиот метеж го заменува со осамен и тивок живот на еден норвешки остров. Наскоро таму доаѓа нејзиниот стар колега, Холгер Мунк, да ја наговори да се врати на работа. Потребна му е нејзината помош за новиот вознемирувачки случај.
Безживотното тело на шестгодишно девојче е пронајдено во шумата, обесено со училиштен ранец на грбот. Околу вратот носи закачена порака: „Патувам сама“.
Дејството всушност кулминира кога исчезнува и шестгодишната внука на Мунк…
Ова е трилер со експлозивна и шокирачка завршница.
За љубителите на романси
„Мирисот на листовите чај“ на Дајна Џефрис
Сместена во дваесеттите години на минатиот век, приказната ја следи младата Англичанка Гвен, која има среќа да ја сретне љубовта на својот живот – русокосиот сопственик на плантажа во Цејлон (денес Шри Ланка). Таа доаѓа со пароброд на островот за да стапи во брак што ветува долг и мирен живот среде високите зелени ридови со чај. Но Лоренс е постојано на работа, а неговата млада сопруга мора сама да ја истражува плантажата. Талкајќи по забранетите места, Гвен наоѓа заклучена врата, премолчено минато.
Гвен наскоро ќе остане бремена, а нејзиниот сопруг е пресреќен. По породувањето таа се соочува со страшна одлука што мора по секоја цена да ја скрие од Лоренс. Кога вистината ќе излезе на виделина, дали сопругот ќе може да ѝ го прости на Гвен тоа што го направила?
За љубителите на научна фантастика
„Едем“ на Станислав Лем
Напишан во 1958 година, „Едем“ ја отвора зрелата епоха во творештвото на Лем од жанрот на научната фантастика.
Експедиција од Земјата поради погрешни пресметки доживува судир со атмосферата и принудно слетува на планетата Едем, при што ракетата се разбива, а екипажот преживува. Што ли ќе затечат земјаните тука?
Жителите создале цивилизација базирана врз биоинженеринг. Генетската контрола сепак се покажала недоволно прецизна. Земјаните се појавуваат во момент кога на планетата се одвива акција на екстерминација. Анонимната влада на Едем се обидува да го сотре поколението на мутанти што содржат дефект. Владетелите имаат власт и врз јазикот, па без исклучок ги тргаат и од него сите формулации што би можеле да ја именуваат фактичката состојба, а на нивно место се појавуваат термини што ја заведуваат стварноста.
Овие политички услови можат да ги потсетат читателите на еден вид орвеловска визија, но далеку повеќе има алузии со доживувањата на Робинзон Крусо и со настаните во „Таинствениот остров“ од Жил Верн. Самиот Лем не сакал да дава изјави за „Едем“, ниту во јавноста ниту во преписките. Постои хипотеза дека премногу се открил себеси во неа и дека главната фабула ја претставуваат своевидни сеќавања за настаните во гетото во Лавов.
За оние што не читаат фикција
„Сѐ што син ми треба да знае за светот“ на Фредрик Бакман
Ова е Бакман каков што досега не сте го виделе – интимен, ранлив и храбар. Оваа книга, пред сè, претставува омаж на љубовта меѓу родителот и детето.
Пред себе имаме длабоко проникливо обраќање од првите борбени редови на едно од најзастрашувачките животни искуства на секој маж: татковството.
Бакман ни дава интимен увид во односот меѓу татковците и синовите. Проникнувајќи длабоко во сопственото искуство и обраќајќи се директно на своето дете, Бакман ги разгледува перспективата и алатките што ќе му бидат потребни на неговиот син за да се снајде во светот.
За најмладите
„Амелија Вампирозабовска и Варварскиот бал“ на Лора Елен Андерсон
Ова е чудесна, илустрирана авантура на малата Амелија од Ноктурнија.
Таа сака да си игра брканица со гоблини и да го гушка своето милениче тиква – Тиквичка.
Мрази кога мора да оди на здодевниот Варварски бал организиран од мајка ѝ и татко ѝ.
Ох, и уште нешто – Амелија е вампирка и гарантира одлична забава. Придружете ѝ се!
И не очајувајте ако не сте со пријателите оваа Нова година. Честитајте им ги празниците на уникатен начин, стоплете им го срцето и зошто да не, напишете им лична порака со честитка. Страниците од книгата сепак ви го овозможуваат тоа!
Уживајте!
