Кон „Сигурен ризик“ од Анде Јанков
„Луѓето се ирационални суштества. Не го правиме секогаш она што е најлогично во даден момент. Напротив, може да се каже дека ретки се моментите кога постапуваме исправно.“
За нашите постапки самите сносуваме одговорност. Тоа отсекогаш било така. Но, да, ние луѓето сме понекогаш ирационални и не секогаш умееме да постапиме исправно.
Врвно авторско остварување на нашиот Анде Јанков! Страниците ги вртев во исчекување, замислувајќи ја следната сцена и очекувајќи уште повисок адреналински шок од претходниот. Ниту за момент не ме зафати монотонија, сакав да останам будна што подолго за да дознаам што ќе се случува понатаму. Низ мајсторски вешти описи на ликовите и на сцените, авторот нѐ води низ улиците на нашиот главен град, каде што ниту во најдлабоката ноќ не е тивко. Токму низ тие улици како камелеон успева да се скрие оној што е одговорен за убиството на младата новинарка, а тимот на русокосиот инспектор, со посебен шарм и харизма, неуморно работи на неговото откривање.
Восхитувачки метафори, неочекувани пресврти, сцени од кои ви запира здивот… сето тоа е квалитетно вклопено во уште една возбудлива приказна за инспекторот Виктор Николов, со што ја буди кај вас потребата да читате уште и уште. Навидум се чини лесно да претпоставите кој е виновникот, но со самиот тек на настаните и копањето по минатото на убиената, сфаќате дека се лажете себеси. Дека ништо не е така како што изгледа. Кога некој се одлучил да ризикува, тогаш оди на сѐ или ништо. Тоа не значи сигурен ризик. Тоа може да значи и сигурна пропаст.
Сѐ до последната страница, со многу умешност и силна авторска имагинација и поткованост што им прилега на врвни раскажувачи, романот го држи во целост вашето внимание. Мојата восхитеност од овој роман е поголема од првиот. Не дека „Виенски гамбит“ нема своја вредност и квалитети. Напротив. Но „Сигурен ризик“ е нешто повеќе од тоа. Ме воодушеви целосната посветеност на некои сосема мали „нишки“ при раскажувањето. Толку мали, а толку големи при создавање на целокупната слика на ова прекрасно дело, кое навистина вреди да се прочита!
Пишува: Билјана Мартиновска 
