Кратки осврти од клубот на читатели за „Пчелно семејство“ од Ања Мугерли
Марина Кљаич
Доколку сте од оние кои не ги сакаат расказите, верувајте дека по книгата „Пчелно семејство” ќе бидете во другата група.
Карактеристично за расказите, кратки се, ликовите се оптимално опишани, имаат необични завршетоци и додека за некого овие особини ги прават истите непривлечни, за мене се баш интригантни и во тоа лежи сиот нивен шарм. Уметност е да “скоцкаш” толку многу содржина во кратка наративна форма. А од аспект на читател, навистина е задоволство и достигнување да успееш да ги доживееш ликовите до крај, да се соживееш со настаните, да пронајдеш заклучок во необичните завршетоци.
Кога станува збор за книгата „Пчелно семејство”, се согласувам со ставот дека авторката со јазична виртуозност нѐ внесува во свет што не го познаваме, иако живееме во него.
Составена е од седум раскази и навидум изгледа мала и кратка, но всушност е голема и со толку длабока содржина. Едноставно извонредна. Заслужено ја добила престижната Награда за литература на ЕУ во 2021.
Убавината на читањето на овие раскази за мене беше во тоа што го доживував оној читателски феномен на испреплетување на реалноста и фантазијата, можното и измисленото, јавето и сонот.
Иако изобилуваат со доста елементи карактеристични за словенечката култура, расказите се идеално дизајнирани да бидат безвременски, универзални, пристапни за секоја публика.
Во ликовите на ова дело препознаваме луѓе на маргините на општеството.
Сместени во одредени средини преку одредени случувања и низ потесни семејни, пертнерски или социјални односи, не само што ни ги доближуваат приказните туку и ни овозможуваат идентификација со истите.
Речиси во секој расказ главен мотив е љубовта и како што и самиот наслов кажува – семејството и сите негови форми и облици.
Раскази кои особено ме допреа се Јаболкарка, Чевли, Пчелно семејство и Езеро.
Одлично четиво кое овозможува извонредно читателско искуство преку кое читателот успева да ги надмине границите – јазичните, културните, политичките, географските, како и оние меѓу реалноста и несвесното.
Најтопла препорака!
Ивана А. Спасовска
Си беше еднаш одамна, едно време кога мислев дека јас, едноставно не сум фан на раскази… Дека се’ си е убаво, ама едноставно не кликнуваме.
Таа ера, очигледно помина по Ања Мугерли.
Сега само се молам, кога ќе споделуваме впечатоци, некој да не ме праша кој ми бил омилен расказ.
Не знам кој е поспецифичен, помистичен, поемотивен…
Во секој расказ Ања Мугерли, суптилно има проткаено древни мистериозни обичаи од словенската историја.
Не знам кој е најубав, нема ни да знам… Сите се најубави!
Билјана Димовски
Четирите основни елементи-оган, воздух, земја, вода и како петти елемент – семејството. Вткаени во седум раскази, секој посветен на по еден древен словенечки обред, секој создава комплетна приказна. Магични, топли, а сепак предизвикуваат морници додека се читаат. Морници од исчекување, од возбуда, од ужас, од лични сеќавања. Со секој следен прочитан си мислев “Еве, овој е тој, главниот, овој ќе го прераскажам!” И ми се лизнаа сите седум за неколку часа, за долго да ми вијат како сврдли во потсвеста.
Билјана Ц. Наумовска
Пчелно семејство е збирка од седум раскази содржински поврзани преку нишката на семејството. Семејството во неколку форми, обединето, неостварено, семејство кое претрпело загуба… Традиционалното испреплетено со модерното. Модерно(то) со почит кон минатото.
На крај, сите ритуали, обичаи и верувања добиваат нова, современа смисла.
Според словенечките традиционални верувања, во некоја длабока јама која порано била езеро, се издигнале грмушки, па дури и дрвја. Се развил посебен екосистем.
Откако се повлекла водата, животот не изумрел, еден вид живот бил заменет со друг.
Така е и во реалниот, модерниот свет.
Страдањето предизвикано од загубата во семејството може да има емоционални, социјални и духовни импликации.
Најважно е да научиме да живееме со таа лузна која останала, да се прилагодиме на новата животна ситуација, целосно способни да продолжиме напред, благодарни за спомените и сѐ она што останало да живее до нас и во нас.
Перица Илиевски
Пчелно семејство е збирка од седум раскази кои на некој начин отсликуваат обичај или обред од словенечката традиција. Секој од расказите обработува различна тема и ја разработува на еден длабок, но интересен начин. Посебно ми се допаднаа Јаболкарката, Чевли и Езеро.
За мене беше добро книжуле, интересно, за да испаднам надвор од конфор зоната од она што читам.
