Кратки осврти од клубот на читатели за „Смола“ од Ане Рил

 

 

Перица Илиевски

 

 

 

Во областа на литературата, постојат одредени ретки скапоцени камења кои пркосат на конвенционалната категоризација, надминувајќи ги границите на жанрот за да им понудат на читателите искуство кое е навистина уникатно. „Смола“ на Ане Рил е токму таква книга и остава неизбришлива трага во психата на секој што ќе ја прочита.
„Смола“ е приказна за семејството, љубовта и темнината што се крие во сите нас. Она што ја издвојува оваа книга од сите други е беспрекорната комбинација на жанрови што го тера читателот да „копа“ низ приказната за да ја открие скриената вистина под слоевите на измама и илузија.
Но она што посебно ме трогна, а верувам и секој друг читател е идејата дека љубовта кога е доведена до крајности, може да стане задушувачка и деструктивна, замаглувајќи ги границите помеѓу наклонетоста и посесивноста.
Лив е обвиена во свет каде што љубовта е и извор на утеха и извор на маки. Нејзините родители, Јенс и Марија, ја опсипуваат со љубов, но нивната љубов е извалкана од нивните сопствени демони и несигурности. Како што се развива приказната, станува јасно дека нивната љубов кон Лив се граничи со опсесија, што доведува до дејства кои се и погрешни и штетни.
Книгава боли, и тоа многу… Цело време слушаме дека деца не добиваат доволно внимание и љубов… Но што ако таа љубов е премногу и им наштетува?
Најголема препорака за секого, без разлика на жанр!!!

 

Ана Петревска

 

 

Не е лесно да се биде родител. Не е лесно да се издигне мало и невино дете, да се оспособи за живот во светот на возрасните, да се припреми за сите удари што ги нанесува животот, околината, општеството, луѓето…..Секој родител секојдневно си го поставува прашањето:”Како да го заштитам моето дете?”.
Но, откако ја прочитав “Смола” ми се врти една мисла, ме мачи едно прашање….дали и прекумерната грижа и заштита за нашите деца се правилно решение и метод на воспитување?
Велат дека најбезбедно место за едно дете е неговото семејство, но дали може да биде и најопасното?
Запознајте ја малата Лив Хордер, главната хероина во приказната “Смола”. Запознајте го нејзиното невообичаено семејство, нивниот изопачен начин на живот, живот во кој сè е има во изобилие….мрачност, осаменост, смрт, предмети, но и премногу љубов и заштита. Лив и нејзиното семејство живеат изолиран живот, имаат чудни навики, изопачени ритуали и ситуации од кои последиците се трауматични. За што ни раскажува Ане Рил, зошто насловот на книгата е токму “Смола” и како е Лив “заштитена” од страна на својот татко, ќе ве оставам да прочитате сами.

 

Марина Стевковска

 

 

Се сеќавате на филмот Јура парк? Кога од парче смола извадија праисториски комарец кој цицал крв од диносаурус? И така изолираа днк од диносаурусите да ги воскреснат? Приказнава нема врска со Јура паркот. Но има врска со смолата. Таа е стара материја, во неа содржи стари зачувани нешта, нешта кои треба , но некогаш и не треба да бидат зачувани. Не случајно насловот на овој роман е „Смола“. Во смолата можеме да ги зачуваме нештата што ги сакаме.
Ова е приказна за едно семејство. Семејство кое живее од собирање борова смола, од продавање борови дрва. Но, ова семејство е поинакво од другите. Таткото се плаши од загуба. Им се раѓаат близнаци, и момчето умира. А девојчето, малечката Лив, за да преживее, престанува да постои. Татко ѝ за да ја заштити, ја изолира од другите луѓе, ја затвора дома, не ја пушта на училиште, ја прогласува за исчезната , па дури и мртва. Ја учи да бега од луѓето, дека луѓето ќе ја повредат, дека ќе ја напуштат, дека ќе остане сама. И таа му верува, како што секое дете верува на својот татко. А мајката, свесна дека тоа е погрешно, не прави ништо за да го убеди својот сопруг за едно поинакво детство на нивната ќерка.
Колку може да биде болна родителската љубов? Секој родител се обидува да го заштити своето дете. Но може ли да го зачува засекогаш, како што ги зачувува нештата во смолата. Не секој сфаќа дека детето е живо суштество кое утре ќе порасне, ќе ги рашири своите крилја и ќе летне да биде свој човек. Новиот живот е нов живот, а не продолжение на стариот. Стравот од загуба не смее да ги помине границите.
Целата приказна е раскажана низ очите на малечката Лив. Таа е сакана, не е тепана, не е сексуално злоставувана. Но таа е учена да се плаши од луѓето, да ги избегнува, да внимава зашто ќе ја однесат далеку од родителите кои ги сака и ја сакаат. Со неа е нејзиниот брат, реален или не, кој ѝ помага во секојдневните игри и обврски. Таа не знае за поинаков живот. Дали ако види како живеат другите луѓе, другите деца, ќе посака да биде како нив?
Трогателна и морничава приказна за судбината на едно дете. Едно дете кое не треба да ги преживува стравовите на родителите, кое заслужува среќно и безгрижно детство опкружено со многу љубов.

 

Билјана Ц. Наумовска

 

 

Постојат ли различни форми на родителска љубов… Ги сака ли некој родител своите деца повеќе, а некој помалку? И по која мерна единица?
Баш таа љубов, која (треба да) важи за најчиста, исконска, во Смола преминува во посесивност до патолошка степен. Таткото Ленс е од оние родители кои (не)свесно ги вкопуваат канџите во душата на своите деца. Класичен пример кога домот и семејството, оние што треба да бидат основен извор на сигурност, стануваат токсична и опасна средина, без никој да е свесен за тоа.
Малата Лив не смее да оди на училиште, зашто само така нема никогаш да ги напушти, ниту пак да се оддалечи од своите родители. А, секој оној кој ќе се спротивстави на оваа одлука, е непријател!
Не е ни чудо што оваа љубов, прерасната во опсесија, ја искривува реалноста на девојчето, па за неа е нормално да се прикрадува ноќе кај соседите и да краде, да има брат близнак кој никој друг не го гледа….и да го чувствува мирисот на смолата.
Тој мирис што ќе ја придружува Лив, секаде и секогаш. Смолата која истовремено лечи, убива, но и чува. Засекогаш…
Вознемирувачка и потресна приказна за тоа на што сѐ е спремен еден маж, татко за да го заштити своето семејство и да го запази начинот на живеење. И сѐ тоа во име на љубовта… За тоа како токму таа љубов и потребата од заштита ќе ја предизвикаат најголемата штета. Приказна во која сите се жртви, а и сите се виновници.