Нема производи.

ОСТРОВЦЕ – детскиот копнеж по безбедно копно

  /  Детско катче   /  ОСТРОВЦЕ – детскиот копнеж по безбедно копно

ОСТРОВЦЕ – детскиот копнеж по безбедно копно

 

 

Нацртај му го домот на детето и тоа повторно ќе го прошара со своите бои.

 

Во овие тропски денови разладете се со прекрасна приказна, која, иако е неверојатно топла, ќе ве заплиска по лицето со понекоја солза, но и ќе ви ги отвори прашањата за наивноста, за несебичноста, за копнежот и среќата, која некогаш се наоѓа во ситните и мали нешта, кои сепак се есенцијални за неизмерна радост и безгрижност, како безбедна почва под нозете. Овие таканаречени луксузи ќе отворат прашања и кај возрасните. Колку се радуваме на она што го поседуваме како неотповикливо право на своина, на нашата загарантирана слобода, на приоритет пред изборот.

„Островце“ е сликовница за моќта на природата и за нејзиното несебично споделување со светот. Сликовница што ќе ви остави една пријатна горчина и како бележник ќе се залиста за срцето. Наменета за помалата читателска публика, на која ни возрасните не остануваат рамнодушни.

Марк Јансен низ илустрации се обидува да ја долови силата на детската благодарност. Дури и кога навидум изгледа дека децата не се свесни за претставата на природата, на пример, или кога помислуваме дека нивната несвесност за чувствата е дел од недоразвиениот емотивен комплекс, се чини дека невиното и наивно око гледа подалеку од рамките со кои возрасните се заградуваат.

 

Зошто „Островце“ е книга што долго останува во сеќавање?

Затоа што е поучна и низ речиси безгласни зборови раскажува за пријателството, за човечката вештина да си го најде компатибилното парче душа со која ќе научи да ја споделува радоста, но и да ја надминува тагата, без притоа разликите меѓу двете сродни души да прават разлика. Пријателството меѓу Софи и Островце е чистокрвно, дестилирано од забуни и предрасуди, од ограничување и оградување. Тие двете се поврзани со нишката на потребата – Островце имајќи ги на својот грб ја лекува осамата, а семејството ја наоѓа потребата за безбедност благодарение на стабилното тло под нозете.

 

 

Игра на годишни времиња

Доколку сметате дека имате добри вештини за скицирање, тогаш нацртајте прикази на четирите годишни времиња. Во спротивно, спуштете и испечатете слики од интернет, кои ќе бидат црно-бели. Побарајте од детето да ги обои, така што ќе ја разликува основната боја на годишното време, белиот снег во зима, жолтите лисја во есен, зеленилото и расцутените плодови во пролет и лето. Обидете се да составите приказна преку асоцијативни прашања. „Што се случува со природата во есен? Како се облекуваат луѓето во лето, а како во зима?“ Обидете се да го проширите описот. Колку повеќе прашања, ќе добиете и повеќе одговори, нели?

 

Игра „Облечи ја желката“

Потребно: слики од 4 годишни времиња што лесно се спојуваат во една целина.

Оваа игра се состои од два дела, потребно е детето да ја спои заднината во една целина, слично на сложувалка, и притоа да образложи зошто ја споило сликата токму така, по таков редослед. Понекогаш, колку нелогично и да е поврзувањето, добива смисла и многу поголема вредност кога детето го дава своето мислење, кое ретко е погрешно.

Во вториот дел од играта, ставете ја 2Д-желката на едно од полињата што отсликуваат годишно време. Настрана поставете ги исечените делови од облека: капче, шал, чадор за дожд, очила за сонце, капа со стреа, лесно фустанче, сандали. Колку е поголем изборот, толку за детето предизвикот ќе биде попродуктивен. „Што ѝ е потребно на желката во пролет? Што ќе облече желката во зима? Како ќе се заштити од дождот?“

Играта може да ја претворите во вистинска забава доколку користите тридимензионална желка и вистинска облека (од кукли, барбики и други играчки), па вашата Островце ја преоблекувате во зависност од годишното време што сте се договориле да ве посети вас и вашето дете.

 

 

Игра „Животните и нивните живеалишта

За поголеми деца, користете атлас. Битно е да бидат запазени границите на континентите и морињата. Доколку детето е запознаено со животинскиот свет и неговите многубројни живеалишта, прашајте го: „Каде живее жирафата? А овцата? Каде китот?“ Продолжете со прашања што би ги поврзале синхронизирано преку аналогија: „Што им е заедничко на слонот и жирафата? Кој живее во истите предели со пингвинот?“ Секако дека делот со интересни и забавни факти го дополнувате вие. „Дали знаеш дека кравите се заштитен знак на швајцарските чоколади, а во Индија имаат статус на свето животно?“ Иако понекогаш ви се причинува дека децата се бомбардирани со информации како последица на интернетот и неговата достапност, притоа без да се обрнува внимание на градивото и нивната возраст, ќе се изненадите од тоа колку децата имаат моќ да запаметат и да впијат нови факти доколку им се презентирани на лесен и забавен начин.

За помали деца (до шест години), нацртајте на еден лист море, на другиот копно. Хартиените фигури, кои слободно може да бидат и 3Д и 2Д модели, наредете ги пред детето. Негова нека биде иницијативата од која фигура ќе почне. Но не заборавајте на прашањата од кои подоцна произлегува и дискусијата: „Кое е ова животно? Каде живее? Со што се храни?“ Детето нека се обиде да ги издвои и да ги сортира. Не прекинувајте годури и кога ќе погреши. На крајот, заедно евалуирајте ги резултатите и посочете му ја грешката.

Од голема помош при оваа едукативна игра се и книгите со фигури од хартија, кои ги има речиси во секој поголем дисконт или книжарница, а се забавни затоа што вклучуваат повеќе училишни предмети и, со самото тоа, вештини за совладување.

 

 

Вежба за интроспекција и за возрасни и за деца

Гласот на желката искористете го за проекција на благодарност. „За што сум денеска благодарен? Кој е моето Островце? Каде се чувствувам безбедно?“ Не застанувајте додека не ги искористите сите прашални зборчиња, барем по еднаш. Дозволете го протекот на идеи затоа што токму тој го стимулира и детето.

Почнете со симулација вие, па отстапете им место на помалите. Бидете водич во инспекцијата по внатрешното. Не заборавајте дека тие скриени капацитети се оние во кои започнува великодушноста, лулката за напредок на светот. И, којзнае, можеби вашата Островце се крие токму таму?

 

Пишува: Јована Матеска-Атанасова

На фотографиите: Ива

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.
    YouTube
    LinkedIn
    Share
    Instagram