Приказна на месец февруари: „Приказничар“ добитник на наградата „Стале Попов“

 

 

Четврт век од првиот објавен расказ, една убава збирка од Жарко Кујунџиски нè носи на патување со приказни коишто се доживуваат.

И само некој месец по своето издавање, книгата веќе се закити со својата прва награда – наградата „Стале Попов“ во склоп на годишните награди на Друштвото на писатели на Македонија (ДПМ).

Имено, на прес-конференцијата која се случи на 11 февруари, по повод објавување на добитниците на годишните награди на ДПМ, претседателот Живко Гроздановски информираше дека збирката раскази „Приказничар“ од Жарко Кујунџиски, во издание на „Антолог“, е добитник на наградата „Стале Попов“ за најдобро прозно дело.

 

Како што се вели во образложението на комисијата, наградената збирка е составена од различни раскази пишувани низ долг временски период, што се забележува во стилот, јазикот и структурата на делото. Заедничко за сите нив е тоа што тие ја имаат приказната, и нејзиното создавање и нејзиното растење до речиси апокалиптични или, пак, банални завршетоци. Без разлика дали приказните се составени од само десет збора или од четири илјади зборови, раскошниот јазик на Кујунџиски „оживува“ во неговите приказни и ги оживува неговите приказни, давајќи ѝ една ритмика на самата збирка. Бидејќи збирката почнува со најкраткиот расказ, а завршува со едно прилично долго писание, очигледно е дека авторот ја разигрува формата. Тој живее со секоја приказна, во секој нејзин ред, во секој нејзин збор. Оттука и насловот „Приказничар“ , кој се однесува на секој од нас, но денес најмногу на Жарко Кујунџиски.