Рецензија од прв читател: Бојан за „Сиракот од Бергамо“ од Петар Стојановски

 

 

Трета книга од македонскиот автор Петар, која подеднакво ме импресионира како неговата претходна книга со наслов “Храмот на Натписите”. Крими-трилер каде што имаме присутен генијален и методичен негативец како и подеднакво способен тим од оперативци од тајната полиција на Италија. Едноставно кажано, тоа се 2 страни од една паричка.

Дејството се одвива во 2 земји: Италија и Швајцарија, кои се одлично опишани и атмосферата е така добро доловена за додека ја читате книгата, да помислите дека во моментот сте на тие места. Калин, оперативец од тајната полиција на Италија, веќе во пензија, кој живее мирен живот скриен во Лугано, добива непланиран повик за враќање во службата. Причината е убиство на неговиот поранешен шеф и порака која е упатена лично за него. Случајот го презема тајната полиција на Италија и играта почнува.

Книга каде што акцијата е секојдневна и опасноста ги демне нашите агенти константно. Поткренато од стар случај, желбата за одмазда присутна во негативецот е толку голема што достигнува нови незамисливи размери. Го поттикнува да развие генијална загатка според која ги врши убиствата и најголемиот предизвик за агентите во оваа книга.  Елементите на мистерија во книгата во комбинација со константна акција создава добитна комбинација што се бара во секоја крими-книга.

Исто така, морам да напоменам на психолошкиот аспект кој е присутен во книгата. Тој е присутен во начинот на мислење и функционирање на агентот Калин, негативецот во книгата, како и на останатите карактери во книгата.

Одлична книга од страна на Петар и дефнитивно очекувам и други книги од негова страна.

 

Пишува: Бојан Радичевски