Рецензија од прв читател: Перица за „Менталист“, новиот интернационален трилер феномен

 

 

 

 

Камила Лекберг & Хенрик Фексеус

(Мина Дабири & Винсент Волдер #1)

Дали знаете што значи менталист? Јас не знаев досега. Тоа е човек што користи психологија, лично влијание и таинствени трикови за да создаде илузија дека е видовит или дека е способен да чита мисли.

Менталист е една уникатна приказна која ни зборува за еден пореметен убиец кој убива со помош на магионичарски илузии или подобро кажано илузии кои тргнале на лошо.

Тимот кој работи на случајот е составен од различни детективи, секој добар во својата област и ова им е случајот со кој може да се докажат.

Она што го прави случајот интригантен е тоа што е пронајдено избодено тело со мечеви преку дупките во кутијата во која се наоѓа. Најпрво изгледа само како брутално убиство, но потоа се дознава дека личи на магионичарска илузија која тргнала во лош правец и на телото е пронајден римскиот број 3. Дали ова значи дека има уште две тела за кои не знаат?

Мина со консултации со својот тим решава да побара помош од познатиот менталист Винсент кој може да ги внесе во тајниот вртлог на илузиите. Но, она што никој не очекува е дека мрачните тајни од минатото, тајни стари четириесет години, ќе испливаат на површината и ќе удрат онаму каде што најмногу боли.

Но она што го прави овој трилер подобар од другите е тоа што го има оној битен фактор којшто фали во класичните трилери, секој од ликовите е соголен и детално прикажан со сите слаби точки кои ги има. Толку добро се напишани ликовите што и јас ја почувствував манијата на Мина за чистота и ред и недостатокот на емпатија и човечка комуникација на Винсент. Буквално, додека читаш – влегуваш во нивната кожа!

У ште еднаш согледуваме дека ако едно дете додека расте нема стабилен дом, живот и родители на кои може да се потпре, голема е веројатноста да израсне во ментално нестабилна личност којашто не може да ја распознае вистината и мисли дека тоа што ќе си го замисли е она вистинското.

Морам да додадам дека првпат во книгава дознав дека постојат животни кои се викаат визони и дека постојат фарми на кои се чуваат.

Напомена: Книгата не е поврзана со серијата која го носи истиот назив и книгата е дел од трилогија чиј трет дел моментално се пишува (Оригиналот на Менталист е издаден во 2021 година).

Најголема препорака за сите љубители на трилери кои сакаат да уживаат во магија која ќе те влече да ги вртиш страниците и да читаш сè додека не ја завршиш книгата.

Пишува: Перица Илиевски