Рецензија: Савче за „Жртва 2117“ од Јуси Адлер-Олсен

 

 

Извонреден трилер низ кој авторот нѐ води преку главните протагонисти, детективите и инспекторите на Секторот Q, како дел од една меѓународна истрага за можеби една од најболните и застрашувачки теми на денешницата, меѓународниот тероризам, правата и слободите на бегалците, мигрантите, кои бегајќи кон подобар живот во Европа, дел го искусуваат горкиот пат до слободата, а некои воопшто и не ја осознаваат. Приказната е уште повозбудлива бидејќи низ самата истрага ја дознаваме и тажната животна приказна на еден од инспекторите од секорот, Асад.

Заплетот започнува кога на една од плажите на Средоземното Море испливува тело на постара жена бегалка, која на столбот за пребројување на удавените мигранти е означена како 2117 удавена жртва во обидот да стигне до посакуваната слобода на европско тло. Жоан, новинар кој штотуку има добиено отказ од работното место, оставен од саканата, скршен и депресивен – одлучен да си го одземе животот, седејќи во едно кафуле на плажата во Барселона и следејќи го извлекувањето на телото на жената сфаќа дека таа не е удавена, туку убиена, па добива идеја дека неговата кариера и живот може да се промени ако открие нешто повеќе за жртвата 2117, и решен е сам да започне истрага за пронаоѓање на нејзиниот убиец.

Самиот Жоан не е свесен во каква опасна „авантура“ се впушта, тргнувајќи преку Кипар од плажата Аја Напа, па се до Франкфурт и Берлин, каде што надежите на новинарот за откривање на идентитетот на убиецот се претвораат во немилосрдна брканица меѓу мачка и глушец, каде секогаш убиецот е чекор пред него.

Пред светот, жртвата 2117 е само уште една бројка, но за тројца луѓе е многу повеќе, нишка која ги поврзува нивните судбини и чија смрт предизвикува лавина од опасни настани и случки водени од единствениот мотив за нив – одмазда.

За Александар, проблематичен дански тинејџер, смртта на жртвата 2117 е симбол на сè што мрази во едно современо западно општество и на секој што му замерува, вклучително и сопственото семејство, па во неа гледа како на некој кој треба да го одмазди. Затворен во својата соба меѓу четири ѕида се заканува дека откако ќе стигне до 2117-тата победа на видеоиграта што ја игра, ќе ги убие своите родители и сите што ќе ги сретне надвор. Што е тоа што го тера овој млад човек на убиствени импулси и извртено расудување, ќе се впуштат во откривање инспекторите Гордон и Росе. Дали тие ќе бидат побрзи од него и ќе го спречат да ја оствари целта?

Од друга страна, пак, за Галиб, чувар од озогласениот затвор „Абу Граиб“, жртвата 2117 е мамец преку кој се обидува да стигне до својот најголем непријател од минатото, Асад, за кого смета дека е главниот виновник за тоа што живее во тело кое е обезличено, па оди дотаму што е спремен да му се одмазди преку најмилите со подготвување терористички акт за кој треба да разбере светот.

Најтрагичните последици од гледањето на мртвата жена на плажата ги доживува Асад, таинствениот лик од Секторот за нерешени случаи Q, кој никогаш никому дотогаш не се доверил за своето минато во Ирак и Сирија, неговиот претходен живот во војската и неговите опасни специјални мисии. Гледањето на фотографијата што го обиколува светот му дава вознемирувачки откритија за неговата сопруга и двете ќерки за кои верува дека се мртви долги години, но истовремено му дава надеж дека тие се живи и ќе успее да стигне на време до нив, иако и самиот е свесен дека патот до нив е поплочен со крв и со смртни последици.

Во целиот тој случај кој добива една меѓународна истрага преку граници заедно со германската полиција, Асад е придружуван од својот колега, инспекторот Карл Морк, кој е несебично решен да му помогне, дури и по цена на својот живот.

Но Галиб е безмилосен и немилосрден, како стратег и номад кој никогаш не престојува на исто место предолго, ги надмудрува сите што ќе стапат во контакт со него, па станува безмилосен мозок кој однапред има подготвено опасен заговор во кој вклучува и невини лица, сѐ со една цел – да го убие Асад.

Дали Асад ќе успее навреме да стигне да се соочи со својот најголем непријател и да го врати своето одамна напуштено семејство?

Посебно фасцинира моментот дека авторот совршено и прецизно ги отсликува карактерите на сите детективи од одделот за нерешени случаи, Гордон, Росе, Карл Морк и Асад, за кој всушност тука дознаваме и за неговото вистинско име и идентитет.

Пишува: Савче Петреска Водасов