Што открива Метју Пери во неговиот мемоар „Пријатели, љубовници и големото ужасно нешто“?
52.5 милиони луѓе ја гледале последната епизода од „Пријатели“, и тоа само во САД.
Иако емитувањето на серијата заврши пред речиси една деценија, таа е длабоко всадена во срцата на билиони луѓе и до ден денес е референца во поп-културата. Затоа, не изненадува фактот што целиот свет беше потресен од прераното починување на Метју Пери. Многумина се чувствуваат како да загубиле близок пријател.
Саканиот актер беше комедиски гениј. Во ликот на Чендлер тој успеа итро да проткае шарм и нежност со цинизам, овозможувајќи им на милиони луѓе низ светот да се чувствуваат видени и разбрани. Но, додека Метју секојдневно дарувал среќа на безброј луѓе, самиот се справувал со психички проблеми и зависности. Пред речиси една година, актерот за првпат одлучи јавно и детално да проговори за неговото внатрешно патување, со надеж дека ќе им помогне на други луѓе.
Топло ги препорачуваме мемоарите на сите кои сакаат да се запознаат повеќе со интимниот свет на познатиот уметник. Книгата не само што ја доближува оваа славна личност до обичните читатели, туку и ја освестува јавноста за важни животни прашања како битката со зависности и психички проблеми.
Во меѓувреме, прочитајте пет важни информации што ги откриваат овие брутално искрени мемоари:
Големото ужасно нешто е зависноста
Во „Пријатели, љубовници и големото ужасно нешто“ Метју Пери става голем акцент врз проблемите што ги имал со зависност и ментално здравје. Тој започнал да пие на 14-годишна возраст, а пиењето само се интензивирало кога почнал да се занимава со глума. Зависноста го однела на темни патишта меѓу кои и чести посети на болници и рехабилициони центри. Актерот речиси целиот свој живот го поминал борејќи се со „ѕверот во себе“ (име кое тој го дава на зависноста).
Метју Пери ги обожавал колегите од „Пријатели“
Метју Пери голем дел од животот се чувствувал отуѓен и осамен, но снимањето на серијата „Пријатели“ го направило да се чувствува сакан и почитуван. На почетокот бил загрижен дека нема да биде најсмешниот актер во просторијата, но потоа со сето срце го прифатил тимот од креативни млади луѓе. Сите глумци од „Пријатели“ постојано си давале меѓусебна поддршка, стимулирајќи се и на професионален и на приватен план.
Џенифер Анинстон му била симпатија
Дали некогаш додека сте гледале епизода од „Пријатели“ сте се запрашале кои од актерите се допаѓаат меѓусебе и во приватниот живот? Метју Пери имал чувства кон Џенифер Анинстон првите години од снимање на серијата. Во еден момент, тој ѝ признал дека му се допаѓа, но Џенифер го одбила и инсистирала да останат пријатели. Најважно е што по одбивањето ни кај двајцата не постоела никаква огорченост. Понатаму во снимањето, таа дури ќе стане првата колешка која добронамерно ќе му ја посочи неговата зависност од алкохол.
Актерот имал бурен љубовен живот
Иако Џенифер Анинстон го одбила Метју, тој сепак имал бурен љубовен живот, а во еден период дури бил во врска и со славната актерка Џулија Робертс. Тој не бил заводник или манипулативен во љубовта. Напротив, Метју се опишува како сензитивен романтичар, а проблемите кои ги имал во врските се должеле на тоа што постојано му било страв да не биде оставен од партнерот. Впрочем, тоа е и причината зошто самиот тој ѝ раскинал на Џулија Робертс.
Метју чувствувал најголема радост кога помагал на други луѓе
Мемоарите даваат детален увид во внатрешниот свет на Метју Пери кој иако обременет со мрак, во суштина бил прекрасен. Во мемоарот јасно се гледа како Пери бил исконски добар човек кој единствено сакал да биде сакан и да ги прави другите луѓе среќни. Освен што тоа го постигнувал преку глумата, Метју кога бил трезвен помагал и на други луѓе да се држат понастрана од алкохол и дрога, преку организацијата Анонимни алкохоличари.
