Кратки осврти од клубот на читатели за „Девојката смрт“ од Луцие Фаулерова

 

 

Ивана А. Спасовска

 

 

Многу автори пишувале на тема самоубиство. Од Мураками, Коељо, Мет Хејг, до омилената ми Џенифер Нивен. Но Луцие Фаулерова го прави тоа сакајќи малку да погледнеш на оваа наводно “крајно лична работа” од перспектива на оние што ги оставаш зад себе… Те тера да размислиш…
Дали стварно нашите животни избори имаат ефект само на нас?
Дали стварно нашиот живот е само наш? Дали можеби по малку не е и на оние со кои сме се родиле или и на оние на кои сме им се ветиле?
Или можеби малку повеќе и на оние на кои им претставуваш цел еден живот, а дефинитивно на оние што би го дале својот живот за тебе…
Дали има такво нешто како “само мој живот”?
Дали со таа “најврвна форма на слобода” сепак сме кројачи на среќата, и уште повеќе, на судбината на луѓето што нас не сакаат?
Препорака за сите големи и мали филозофи за смислата на животот и границата помеѓу слободата и себичноста.

Билјана Ц. Наумовска

 

 

Смислата на постоењето, потребата од сегашноста… И..? Која е крајната дестинација?
Токму од тука произлегува филозофијата на животот, од чинот на размислување за постоењето. Слободната волја, како филозофски концепт, е всушност слободата на човекот да одлучува за своите дејствувања и постапки.
А, смртта? И таа ли треба да е право на сопствен избор?
Изборот, сепак, нека биде меѓу холандскиот никсен и шведскиот лагом.
Девојката смрт е уште еден психолошки роман, кој дефинитивно ќе иницира размислување кај секој читател. Мачно добра!

 

Перица Илиевски

 

 

“Девојката смрт“ од Луцие Фаулерова е литературно патешествие што остава трајни впечатоци. Ќе се сретнете со уникатен стил на раскажување што ве носи низ лавиринт на емоции и искуства. Изобилува со јазик и фрагментрирана наратива на високо ниво.
Преовладува со комплексност која додава длабочина на приказната и со тоа Луцие навлегува во сложеноста на болката, динамиката во семејството и човековата психа. Како што одминува приказната во книгата, авторката успева да предизвика широк спектар на емоции, од меланхолија и анксионзност па се до моменти на разбирање и забава.
Препорака за оние што се подготвени да се впуштат во истражување на предизвикувачки наративи и да размислуваат за длабоки прашања.