Нема производи.

„Скриени желби, немирни патувања“ на Владимир Јанковски – Роман на годината за 2020

  /  Соопштенија   /  „Скриени желби, немирни патувања“ на Владимир Јанковски – Роман на годината за 2020

„Скриени желби, немирни патувања“ на Владимир Јанковски – Роман на годината за 2020

 

 

15 март 2021, Скопје – Издавачката куќа „Антолог“ од Скопје со огромно задоволство објавува дека добитник на престижната награда Роман на годината 2020, која ја доделува фондацијата „Славко Јаневски“ 22. пат по ред, е романот Скриени желби, немирни патувања на Владимир Јанковски.

 

Во конкуренција на 41 пристигнат роман, жири-комисијата за доделување на наградата во состав Оливера Николова (претседателка и минатогодишна лауреатка), Зоран Анчевски, Калина Малеска, Живко Грозданоски и Катерина Богоева, се одлучи наградата да ја добие најновото книжевно остварување на Јанковски.

„Романот Скриени желби, немирни патувања на Владимир Јанковски е впечатливо дело, оригинална иновација во македонската литература. Со исклучително занимлива колажна структура, базирана врз животна уверливост и многуслојност, оваа проза пулсира со ново преосмислување на човечките односи, перципирајќи го светот како единствена мрежа од концепти и судбини што се развиваат во перспективи и во меѓусебна корелација. Неколкуте приказни, соопштувани во лапидарни секвенции, го градат овој мозаичен роман ширејќи ја убедливо неговата првобитна поставеност“, се вели во образложението за одлуката на жири-комисијата за доделување на наградата.

Лауреатот Владимир Јанковски – писател, книжевник и преведувач – по овој повод изјавува: „Во оваа пригода би сакал да ѝ се заблагодарам на фондацијата Славко Јаневски за целиот ангажман околу доделувањето на наградата Роман на годината зашто со сите активности поврзани со оваа награда успеваат да ја зголемат видливоста на романескната продукција во време кога литературата не е доволно застапена во јавната сфера. Ова особено важи за телевизиите, кои секојдневно нè бомбардираат со приказни за ‘исто за истото’, на кои под изговорот дека станува збор за важни теми за нашиот живот, постојано слушаме исти варијации на теми што служат само за стерилни пресметки на политичките елити. Добрата литература се обидува да го направи спротивното. Таа во навидум црно-белата поставеност на нештата се обидува да ја даде нијансата на различност, да го постави животот надвор од поедноставувањето и стереотипот. Дел од романите што беа во конкуренцијата за Роман на година го прават токму тоа, ја истражуваат сложеноста на животот, укажувајќи на неговата суштинска амбивалентност, противречност и нијансираност. Затоа заслужуваат многу поголемо внимание од црно-белата слика што медиумите секојдневно ја претставуваат како наша реалност.“

Покрај наградената книга на Јанковски, во финалето за наградата влезе уште еден роман во издание на „Антолог“ – Сфинга на гневот од Жарко Кујунџиски, заедно со: Лето во кое те нема од Петар Андоновски („Или – или“), Суво мастило од Владимир Илиевски („Македоника литера“) и Куќа над брановите од Билјана С. Црвенковска („Чудна шума“).

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.
    YouTube
    LinkedIn
    Share
    Instagram