СООПШТЕНИЕ: АНТОЛОГ ЈА ОБЈАВИ КНИГАТА „КРИВО РАЛО“ ОД ИТАМАР ВИЕИРА ЈУНИОР

 

 

16 август 2023

 

 

Добитник на најпрестижната португалска награда „Лежа“ (2018)

Наградата „Оцеанос“

Награда „Жабути“

Издавачката куќа Антолог од Скопје со големо задоволство соопштува дека ја објави книгата:

 

„Криво рало“ од Итамар Виеира Јуниор

 

Поглед кон животот на потомците на ослободените робови во хациендите од руралниот Бразил.

Книгата сликовито ги прикажува културата, обичаите, верувањата, како и тесната поврзаност со земјата и природата, но и нееднаквоста и неправдите на кои биле изложени овие луѓе. Нивното освестување за барање на своите права е претставено многу нежно и едноставно, преку приказната за две сестри во хациендата „Црна вода“, Бибијана и една година помалата Белонисија.

Сè започнува со детска игра во која се случува несреќа со ножот скриен во бабиниот куфер, поради која едната сестра останува нема, а другата се претвора во нејзиниот глас, поврзувајќи се на необичен начин. Со текот на времето, сестрите се оддалечуваат. Белонисија останува, а Бибијана го напушта родителскиот дом, се мажи и станува мајка. Но судбината повторно ќе ги спои во хациендата…

 

„Криво рало“ е прекрасна приказна во која мајсторски се спојуваат лириката, магијата и реалноста. Книгата е објавена со поддршка од Специјалниот секретаријат за култура при Министерството за туризам на Бразил/Фондацијата Национална библиотека и Министерството за надворешни работи.

 

„Лежа“ е португалска книжевна награда основана во 2008 година. Наградата се доделува секоја година за најдобар необјавен роман на португалски јазик. Победникот добива 100.000 евра, што ја прави една од најбогатите книжевни награди во светот.

 

За авторот:  Итамар Виеира Јуниор (1979) е бразилски писател и географ. Поседува докторат по етнички и африкански студии. Дебитира со збирка раскази за која ја освојува наградата „Уметност и култура“. За романот „Криво рало“ се здобива со најпрестижната португалска книжевна награда „Лежа“ (2018), а подоцна ги освојува и наградите „Оцеанос“ и „Жабути“. Книгата е преведена на неколку јазици, а во 2023 е направена и адаптација за телевизиска серија.

 

 

 

 

 

За преведувачката: Виолета Јагев (родена 1953) е дипломиран инженер технолог и преведувач од шпански јазик. Живеела во Перу 17 години, каде што на шпански јазик завршила основно и средно образование и првите две години на факултетот за петрохемија. Дипломирала на Технолошкиот факултет при Универзитетот „Св. Кирил и Методиј“ во Скопје. Со преведување се занимава од 1979 година и има над 40 книжевни преводи. Добитник е на наградата за превод „Ванѓа Ча­шуле“  во 2012 година и на наградата „Кирил Пејчиновиќ“ за преве­дувачкиот опус во 2017 година на Советот на Меѓународната средба на книжевните преведувачи.

 

 

 

 

Ние сме сериозно свесни за суровите предизвици пред кои се исправени планетата и човештвото и поради тоа „Антолог“ ја лансира „Се грижиме за планетата“, агенда за одговорно однесување кон природата и заедницата и со објавување на секоја нова книга, опфаќаме конкретни мерки и активности за еколошко, одржливо, етичко и социјално одговорно однесување.

Повеќе на: https://antolog.mk/se-grizhime-za-planetata/

 

 

Следете нè на:

Facebook

АНТОЛОГ – Книжевен центар

 

Instagram

antolog_mk

 

Youtube
https://www.youtube.com/channel/UCPMeZZYy8_NAAGJ4bUR3OeA