„И ѕирка и проѕирка“ од Огнена Никуљски во финале за „Роман на годината“
„И ѕирка и проѕирка“ од Огнена Никуљски се најде во трите наслови кои се во финалната трка за „Роман на годината“. Покрај „И ѕирка и проѕирка“, во најтесниот избор се и делата: „Простување“ од Кица Колбе („Или-или“) и „Светот што го избрав“ од Калина Малеска („Или-или“). „Роман на годината“ е годишна награда што ја доделува Фондацијата за унапредување и промоција на културните вредности „Славко Јаневски“.
„И ѕирка и проѕирка“ е искрена и топла приказна создадена од многу свои делови кои понекогаш човекот (читателот) заборава дека се составен дел од неговиот живот. Низ страниците на книгата се забележува мозаик од животни моменти и рефлексии кои се толку човечки, вистинити, сродни.
Ова не е обична приказна. Ова е своја приказна. Одлмоки од секојдневието и одломки од главата. Приказна во книга во која се истражуваат улогите во животот на една жена и како таа се поставува со нив. Сите нејзини моќни и помалку моќни страни, карактеристики на кои сме свикнати и оние кои ни се нови на нас. Како таа храбро раскажува за она што се случува во животот, но и во главата на една жена која има бујна фантазија, а цврсто стои со нозете на земја.
Самата авторка вели „Немам опит како раскажувач.“ А всушност, толку убедливо и суптилно ве води низ она што сака да ви го раскаже. На моменти, читателот не е свесен дали се зборува за туѓ или за неговиот живот, дали авторката зборува за себе или тоа е само фантазија.
Делото завршува со одломка во која авторка ги споделува своите скромни мудрости за животот. Дејсност со која всушност дава перспектива на тоа колку човекот е мал – спрема својот живот, својата околина, планетата, она што го нарекуваме судбина.
На конкурсот за наградата „Роман на годината“ годинава се пријавиле 43 романи, а жири-комисијата преку неколку селекции стаса до најтесниот избор. Како една од спецификите на годинашниот конкурс е фактот дека во најтесниот избор влегоа романи напишани од авторки, што е своевиден куриозитет во историјата на наградата. Ова го реши жири-комисијата во состав: Лидија Димковска (минатогодишна лауреатка и претседателка на жирито), Маја Бојаџиевска, Ѓоко Здравески, Андреј Ал-Асади и Катерина Богоева (претставничка на Фондацијата). 
Насловот на победничкиот роман ќе биде соопштен на прес-конференција на 14 март (петок) што ќе се одржи во кафе-книжарницата „Буква“ во Скопје, во 12 часот. Наградата „Роман на годината“ годинава се доделува по 26-ти пат, а свеченото врачување ќе се одржи кон средината на мај. Наградата, чиј генерален покровител е „Комерцијална банка“ АД Скопје, а поддржана е и од Министерството за култура и туризам на Република Северна Македонија, се состои од плакета, статуетка и паричен износ од 150 000 денари што ги добива авторот, во случајот авторката, на победничкиот роман.
