![](https://antolog.mk/wp-content/uploads/2024/06/Titi_featured.jpg)
Тијана Милиќ, технички координатор
„Секое утро патот до дома е сѐ подолг и подолг“ – Фредрик Бакман
Најубавите вистини на светот собрани во едно книгиче. Ова ми е прва книга која ја имам прочитано од Бакман и мислам дека бев поместена од сопствената оска. Книга која потсетува да се радуваме на малите нешта и нè потсетува на некои универзални вистини кои сѐ нешто ги забораваме со секојдневните обврски. Одличен подарок за драги луѓе.
„А еднаш учителката сакаше да напишеме што мислиме за смислата на животот.
Што напиша ти?
Друштво.“
„Војната нема женско лице“ – Светлана Алексиевич
Како голем љубител на историја и лични приказни оваа книга ме распарчи и ме состави од ново. Целиот опус на Светлана дава фантастичен поглед на сите нишки на човековиот живот – љубов, загуба, пријателства, болка, надеж дури и во најмрачните моменти. Маестрална книга која хорорите на војната ги опишува од аспект на секојдневниот живот на една жена. На моменти сте толку внесени во приказните што заборавате дека овие случки навистина се случиле. Кога повторно ќе се сетите на тоа, ве полазуваат морници. Збирка која е доказ за храброста и истрајноста на жената.
„Гитара од палисандер“ – Кристина Гавран
Книга која се чита во еден здив. Прекрасна приказна за жената и музиката која ве води низ фантазија, народни обичаи и недоумниците на модерното време. Иако фикција, ве тера да размислувате дали жената и гитарата се поврзани само заради сличноста на нивните тела или врската меѓу нив е многу подлабока? Гавран пишува на многу модерен и весел начин, што само додава на убавината на приказната.
„Голманката и морето“ – Марија Пар
Јас сум човек што често знае книгите да ги чита по некој свој или обратен редослед па така беше и со оваа. Продолжението на „Вафли во форма на срце“ го читав пред да ја знам оригиналната приказна. Иако се класифицира како книга за деца, уживав во ведрината на ова четиво. Авантурите на Триле и Лена одблизу покажуваат како децата ги осознаваат своите емоции и елементите на животот со кој се соочени. Плус, Лена е супер другарка која храбро работи на своите соништа. Мислам дека сите можеме да се угледаме на неа.
„Гала Дали“ – Кармен Доминго
Фасцинирана сум од фактот дека многу светски генијалци во својот живот имале по некоја словенска жена. Од Ајнштајн, Пикасо… до Дали. Доколку сте љубопитни за тој феномен, ова е одлична книга која покажува како тој живот изгледа „ зад кулисите “ – и во добро и во зло. Интересно е како во книгава има од сѐ по нешто: од уметничка креативност до умешноста на живеењето и креативноста на човечките односи.