Првиот победнички расказ од Кутијата на приказни
На првиот предизвик од рубриката посветена на најмладите, Кутија на приказни, пристигнаа уникатни приказни и творби, кои, искрени да бидеме, дури и нам ни ја заскокоткаа фантазијата. Но јас и Ива одлучивме сликовницата да ја добие осумгодишната Ангела и се надеваме дека ќе ѝ биде предмет на инспирација талентираната Ангела да набои приказна со боичките на сопствената имагинација. И, којзнае, да отпатува во нови магични предели. Се согласувате ли?
Лео беше болен. Лежеше во креветчето и му беше мнооооогу здодевно. Ех, само кога би смеел малку да излезам и да прошетам, си помисли Лео. Кога не би морал да бидам прикован за креветов. Ајде заедно да патуваме, Лео слушна еден глас. Тоа беше глас на девојче што во рацете носеше листови и боички. Девојчето, кое се викаше Леа, надува еден огроооомен балон и му рече на Лео: Јас ќе ти покажам како може да патуваш дури и без да се помрднеш од креветот, само ако имаш доволно фантазија. Девојчето почна да црта птици, кои наеднаш полетаа од неговиот цртеж насекаде околу Лео и Леа. Уау! Големи разнобојни птици со огромни клунови. Лео беше воодушевен. Тогаш и тој почна да црта. Кога, се случи чудо. Неговиот кревет летна на балонот високо кон небото (а зарем не му беше креветот во соба?). Тој и Леа заедно цртаа, а нивните цртежи оживуваа и им откриваа нови светови. Летаа преку мориња и океани, планини и долини, реки и езера. Влегоа и во една разнобојна џунгла со многу чудни животни. Каде се видело октопод во џунгла? А овој беше виолетов и го крена креветчето на Лео и тоа како бротче пловеше во чудниот океан. Леа и Лео лежеа, пловеа и уживаа во глетката. Се запознаа со рибите и со другите жители на чудниот океан што се наоѓаше среде џунглата. Каде да одат следно? Високо кон планините, на островот на пингвините, длабоко во морето кај морското чудовиште или да се вратат дома? Не, уште беше рано за дома, или тие сепак воопшто не ја напуштија собата на Лео, погледни онаму, зарем тоа не е неговиот плакар? Но што е тоа околу него, нема толку животни во собата на Лео!
Ангела, 8 години
