Три кратки осврти од наши читателки за „W“ од Игор Штикс

 

 

Што се крие зад загадочниот наслов W? Буква длабоко врежана во една карпа, сведоштво за едно пријателство. W или дупло V, едно за Vladimir едно за Valter. Двајца млади левичари, желни за револуција, копнеат за авантура и живот без забрани, контроли и ограничувања.

Како такви, учествуват во познатиот протестен марш во Париз во 1968, за промена на универзитетскиот систем и целосна субверзија на буржоаското општество.

Но, кога сите барања, бунтови, петиции, не даваат резултат, а угнетувањата и хегемонијата се зголемуваат, се затвараат сите врати и прозорци кон иднината, единствениот излез Владимир го гледа во насилството.

Започнуваат герила левичарски акции ширум Европа. После еден таков напад, кој завршува со смртни случаи, Валтер почнува да се оградува од идејата за револуционерен пресврт, од ужасите кои ги направиле во име на идеологијата за која се борат.

Па, од радикален левичар станува десничарски мислител. А, Vita activa и Vita contemplativa не одат рака под рака, нели? Така, патиштата им се разидуваат. Од пријатели и браќа по крвна заклетва, стануваат крвни непријатели…

После повеќе од 25 години, Валтер е убиен под сомнителни околности, неговото изрешетено тело е пронајдено во Далмација. Нема сведоци, нема осомничени.

Игор Штикс и Теса Симон, кои всушност, според тестаментот на Валтер се неговите единствени наследници, се тие кои ќе пробаат да ги откријат тајните и околностите на неговата смрт. Која е Всушност Теса и каква е нејзината поврзаност со Валтер? Или можеби со Владимир?

Роман во кој ништо не е како што изгледа и во кој нема да ја откриете вистината сѐ до последната страница. Но, тука не е ни важна вистината. Важна е само приказната.

Овој роман отвара круцијални прашања на нашата ера: што научивме од борбите за еднаквост и слобода од минатото, и што можеме да направиме денес, соочени со “современиот” етатизам?

Истражувајќи на интернет, наидов на една изјава на авторот, вели вака: Roman govori o tome, što nam se to dogodilo u poslednjih pedeset godina, u kakvom svjetu živimo i zašto je to tako…

Zašto smo zaboravili sanjati, zašto smo zaboravili na utopiju …?!?

Тензичен, слоевит роман, а стилот на Штикс е врв! Исклучително зрел и интелигентен.

Огромна препорака!!! Мust read!

Пишува: Билјана Ц. Наумовска

 

Ова е едно комплексно дело, кое на прв поглед е политички трилер, на втор приказна за едно другарство во повоена Југославија, и отвора уште безброј погледи за милион прашања. Иако изобилува со политичка историја, односно за настани поврзани со левичарското движење низ целиот свет, не е многу комплицирана за читање. Дури ни за мене, која само имаше наслушнато за дел од настаните. Тоа се должи на одлично склопената приказна за Валтер и Владимир, и двајцата воени сираци, кои се среќаваат и симболично стануваат браќа по крв на работна акција на еден остров. И покрај раздвоеноста, тие сепак успеваат да се здружат и тргнуваат во својот левичарски поход. Набрзо стануваат познати по своите дејствувања, за нив се плетат легенди, тие се трн во око на сите европски разузнавачки служби. Одлично се опишани борбите, падовите и застранувањата на левицата. Со политичкото созревање, доаѓа до разидување на неразделните В и В, како физичко, така и идеолошко. Крвните браќа практично стануваат непријатели, но и понатаму ги збунуваат оние кои ги гонат. Целата приказна ја раскажува интелектуалецот Игор Штикс (да, така се вика и главниот наратор), кој е прозван токму од мистериозниот Валтер прво да ја дознае, па да ја пренесе мистеријата за дуплото В. Книгата има многу пресврти, кои нема да ги откривам и многу симболика во врска со историјата на Југославија, Европа, сјајот и бедата на левичарското движење. Штикс стварно одлично пишува и она што ми е најважно при читањето, отвора нови и нови теми за размислување и дискусија.

Пишува: Билјана Димовски

 

“Знаев дека летаме над архипелагот во чиешто море последен пат се бањав како дете, пред дваесет и пет години, додека војната веќе почнуваше блиску до мене, речиси веднаш зад брегот. Во скутот го имав ракописот на романот W, неколкуте негови поглавја, заедно со белешките и фрагментите запишани според кажувањето на Валтер Штиклер (Walter Stikler). Неодамна е најден мртов, со изрешетано тело, во водите под мене. Не очекував дека ќе бидам викнат на Остров. На враќањето не му се надевав.

Од Сараево заминав во текот на војната, како бегалец, кај роднините. Потоа тргнав на студии во Франција.

Мислев дека домот го најдов во Париз, не оној дом што другите го подготвиле за нас, туку дом кој самите си го одбираме, самите го проектираме и го градиме со сопствени раце. Тој дом имаше нарочна заштита од корозивните влијанија на спомените. И ветуваше дека така ќе остане, сѐ до неодамна, до средбата со Валтер Штиклер. ( Walter Stickler) ”

Вака започнува романот W, извонредно напишана приказна во чија срж се испреплетуваат темите за раѓањето, адолесценцијата, растењето, потрагата по потеклото, пријателството, љубовта, романтиката, политичката борба за поправедно општество и историјата на силните политички идеи.

Би можеле да го дефинираме како политички трилер.

Преку главната сижејна линија, главниот протагонист не води низ трнливиот пат граден во борба против социјалната неправда кон дестинацијата подобра иднина и подобар свет.

Нараторот паралелно ни ја раскажува приказната за Волтер, а преку неа и за Владимир, најдобриот пријател на Валтер од детството, кој во еден момент станува негов непријател, и приказната за себе си и Теса, жената која Валтер му ја “наметнува” по својата смрт.

Заплеткани во вителот на историјата преку нивната истрага ќе ја откријат не само мистеријата за смртта на Волтер, туку и раѓањето на Теса и личната историја на Игор.

Приказна за двајцата В или W ( дупло В ) ќе го задржи вашето внимание, ќе ве натера дополнително да истражувате и пребарувате историски настани и личности.

Како што самата библиотека на Валтер ни кажува преку констелација на политичка теорија, филозофија и историја, оваа книга ги наметнува прашањата: „Како луѓето можат да го променат светот? Како го сменија кога можеа да го сменат? Како да го промените кога повторно ќе се појави можност?“

Ова е роман за оние кои не можат да се помират со нееднаквоста и социјалната неправда, а верувам дека во секој од нас лежи по една таква личност.

Најтопла препорака!

Пишува: Марина Кљаич Петковски