Рецензија: Ани за „Рудникот“ од Миодраг Мајиќ

 

 

Есенва го поканивме српскиот автор Миодраг Мајиќ да ја промовира својата најнова книга „Рудникот“ во Скопје. По тој повод, организиравме giveaway-предизвик на кој Анита Петреска победи и ја доби книгата за подарок. Таа одлучи да напише осврт за култното дело, а нас толку ни се допаѓаше нејзиното толкување што решивме да го објавиме на нашата блог-страница. Уживајте во текстот!

 

 

О С В Р Т

„Рудникот“ – Миодраг Мајиќ

„Одлуките донесени во афект често се единствените правилни. Интензитетот на чувството дека одлуката е правилна, редовно е обратнопропорционален на можноста на согледувањето на нејзините конечни последици.”

Мајиќ создал совршен ролеркостер на настани, за да читателот има слободна волја да процени што е веродостојно, а што плод на имагинација.

Богдан Бањац е сржта на целата приказна, поранешен адвокат, кој се наоѓа во санаториум во Јаруги. Неговата сторија е на ранг на “совршено убиство”, меѓутоа состојбата во која се наоѓа е преседан за нас читателите да ја земеме со резерва неговата реконструкција на минатото.

Богдан имал тешко и трауматично детство, судбината си поиграла со неговата младост, но неговата баба Зорка, како вистински стожер на фамилијарната добробит во секое балканско семејство, го изведува на прав пат. Во аманет ќе му го остави имотот во Лугови, епицентарот на Богдановите кажувања и главната причина што ќе го натера да ја обзнани вистината за Црниот мајдан. Дали неговото враќање во минатото, соголувајќи се пред доктор Леви ќе го состави мозаикот? Дали правдата ќе ги вкуси плодовите на правото?

Кога Богдан ќе почне да работи како адвокат за ГМГ, неговите соништа почнуваат да се реализираат. Работа во компанија за која сите мечтаат, совршена љубовна приказна со Сара, сите животни задоволства за кои вечно чезнеел. Аманетот кој ќе ја разниша хармонијата што дури ни неговата сиромаштија нема да успее е имотот во селото каде тлеат црнилата од минатото.

Таму, во Лугови, во полињата со јачмен неговиот пат ќе се испреплете со Дуња, докторката во селската амбуланта, која ќе биде негов сојузник во потрагата по вистината. Селото доживува тотална катаклизма, ниту начелата на медицината не можат да ги откријат вистинските причини за зголемениот број на смртни случаи, деформираните животни, психо-соматските промени кај мештаните. Што се крие во Црниот мајдан? Крајот на тунелот или почетокот на пеколот?

Дури и кога ќе решите да му верувате во сè што кажува, спремете се за умствена дисторзија и домино ефект, каков што ни најголемите мајстори на илузијата не можат да Ви приредат. Богдан е гласот на секој од нас во борбата против криминалот, корупцијата, непотизмот и високите корпоративни цели на сметка на животот, па дури и смртта на обичните луѓе. Мајиќ во Рудникот обработува горливо прашање за еколошкиот криминал кој коси по највисоките човечки вредности, достоинството на живиот и пиететот на мртвиот. Да се замислиме, да размислиме и да се бориме да не станеме зомби во своето тело, глас и дух!

 

Пишува: Анита Перовска