Анита за „АНТАБУС“ од Серај Шахинер
Не знам колку сте свесни, особено жените, дека времињата можеби добиле поинаква димензија и темпо, но инфериорноста на женската мисла, „тежината“ на женскиот збор, па дури и смислата на женското битување доживува тотална општествена катарза.
Дали имате претстава колку Лејли чекорат меѓу нас? Кога последен пат сте се запрашале дали Лејла навистина се удрила од врата или модринките се пехар на нечија супериорност? Дали ја чувствувате уништената младост од нечија „доминантна“ сперма, скршена утроба од премногу абортуси и сурови кошмари од кои секоја Лејла поединечно никогаш не успева да го ослободи умот и да го излечи телото. Тие девојки и жени никогаш повеќе немаат доверба, ни малку во околината, а уште помалку во системот кој нивните животни страдања и срамови ги остава заклучени во фиоки.
Верувам дека сте свесни дека женското НЕ, сè уште значи силување на работно место, семејно насилство, обесчестување во брак, стигматизација од крахираниот систем кој жената и во овие модерни времиња ја третира како добиток за продажба на пазар за „две банки“.Женското тело секојдневно се сервира како антабус на мала сцена. На големите сцени не се „служат“ приказни за силувани и тепани жени.
Нашата главна хероина е петнаесетгодишната Лејла, единствената ќерка на работничко семејство кое се доселува од Анадолија во Истанбул. Наместо да оди на училиште, таа почнува да работи во конфекција. Тогаш без прашање тргнува на „меден месец“ од кој нема враќање.Лејла е симбол на женскиот непокор, феникс изроден од пепел, кревка, со скршени крилја, сепак таа е мајка која е спремна да ја прифати умирачката како свое ослободување од „медениот месец“ на кој полета со карта во еден правец. Лејла е жена чиј последен бедем е искушението на клетата судбина да ја избере смртта како прототип на животот.
Оваа книга е мала по бројот на страници, меѓутоа треба да добие огромно внимание поради приказната што Шахинер ја ставила на тапет. Ова е приказна која секоја жена треба да ја препрочитува секојпат кога наместо да поддржи скршено женско тело, исфрла отров од уста, мислејќи дека не може да добие ист ваков животен билет.
Што е АНТАБУС?
Антабус е продажно име за дисулфирам, лек кој предизвикува мачнина кога се наоѓа во крвотокот на лица кои консумираат алкохол. Се користи како аверзивна терапија при лечење алкохолизам. Овој лек исто така се испитува за лечење на зависност од кокаин, бидејќи го спречува разложувањето на допаминот (невротрансмитер чие ослободување го стимулира кокаинот). Преголема количина допамин предизвикува анксиозност, покачен крвен притисок, немир и други непријатни симптоми.
Во прилог ќе наведам и официјални статистички податоци за бројот на жени и деца кои биле жртви на семејно и сексуално насилство.
Турција е рангирана како 127 од 146 држави за почитување на нееднаквостите помеѓу мажите и жените во извештајот на Светскиот економски форум за 2024 година.
Вкупно 193 212 истраги за сексуално насилство биле покренати во 2023 година во Турција. Од вкупната бројка дури 66 138 случаи вклучувале сексуално насилство врз деца.
Бројот на случаи под истрага доживеал пораст од 62,4% во 2023 година споредено со 2022.
Помеѓу 2015 и 2023 година бројот на случаи на сексуално насилство над деца во Турција се зголемил за фрапантни 94% според податоците од Стокхломскиот центар за слобода.
Пишува:
Анита Перовска | _serendipity.books_
