Елена Бошбож: Со митологии, рака под рака, чекорев уште од најмали нозе – целиот живот ми бил некој начин на истражување.
- Неодамна се одржа промоцијата на вашата книга „Сонцето под земја, кралството над него“. Какво е чувството по објавувањето на првата книга и какви ви се впечатоците по убавата промоција?
Е.Б: Сè помина како во сон, вистинско волшепство. А чувството не се опишува.
- Особено сме радосни што сте дел од семејството на домашни автори во „Антолог“! Од која возраст пишувате? Што ве поттикна да го испратите вашиот ракопис и колку храброст е потребно за тоа?
Е.Б: Честа да се биде дел од семејството на домашни автори во „Антолог“ е преголема. Инаку, пишувам од околу 11-годишна возраст. Прво почнав да пишувам поезија, како многу, многу други тинејџери. Па потоа си пишував раскази, некои „книгички“ и така… си пишував сè и сешто. Ракописот кој подоцна стана „Сонцето под земја, кралството над него“ го завршив во 2021 година, но во „Антолог“ го испратив дури по една година. Бев поттикната да го испратам во оваа издавачка куќа бидејќи „Антолог“ е синоним за квалитет. А за храброст… да, сметам дека е навистина храбар, а понекогаш и луд потег да се сподели нешто толку интимно, толку посебно – како што секое дело за писателот кој го напишал е токму такво, посебно и интимно.
- Велат дека: добар читател е одличен писател. Колку се согласувате со ова и на кои дела и автори сте им благодарна за книгата која ја напишавте?
Е.Б: Сосема се согласувам. Читањето и пишувањето не смеат да се разделуваат. Како голем љубител на книги, не можам да замислам живот кој не е пропратен од разноразни приказни. Автори кои ми биле и секогаш ќе ми се инспирација се следните: Ф. Достоевски, Џ. Р. Р. Мартин, Ш. Џексон, В. Шекспир, Н. Гејман, Е. А. По, Е. Рајс, Џ. Р. Р. Толкин, Д. Алигиери. Станав љубител на книги откако го прочитав „Пеколот“ на Данте, бев инспирирана да напишам свој роман кога ја прочитав „Злосторство и казна“ и бев тотално маѓепсана по читањето на „Песната за мразот и огнот“ и останатите новели поврзани со тој свет од Џорџ Мартин. Од Ширли Џексон и Нил Гејман научив колку се важи стилот на еден автор и авторскиот глас. А Толкин… за Толкин нема потреба да зборувам, се разбира дека тој е инспирација за сите кои пишуваат епска-фантастика.
- Воочлив е вашиот труд во однос на митолошките елементи, претпоставуваме дека ви требало многу време и проучување на многу митови од различни народи. Но, дали врз наративното дејство влијаеле и некои вистински историски настани?
Е.Б: Одлично прашање. Со митологии, рака под рака, чекорев уште од најмали нозе – целиот живот ми бил некој начин на истражување. А за вистински настани не сум сигурна… не можам да ставам јасна граница точно кои настани и личности – историски или митолошки, ми биле влијание за да ја напишам книгата.
- Најчесто се смета дека фантастиката е „резервирана“ за деца, но вие ни дадовте едно сериозно дело. Според вас, која е смислата на фантастиката? Од каде потребата да се изгради и да се пишува за еден сосема нов, друг свет?
Е.Б: Секој човек во себе си носи свој свет. Некој поголем, некој помал. Некој исполнет со магија, некој претопен во секојдневие. А луѓето кои одлучуваат да споделат парче од својот свет се обично тие луѓе чии внатрешен свет им станал толку голем што мора малку да им излезе надвор од нив… инаку највероватно ќе ги загуши.
- Кога би бирале дали би одбрале да живеете во светот од вашата книга или нашиот?
Е.Б: Веќе живеам во двата светови, и добро ми е вака, во средината – измеѓу двата. Но навистина би сакала да можев да го посетам Сончевото кралство во физичка смисла.
- Дали имате уште необјавени книги? Се надеваме дека наскоро ќе го објавиме и вториот дел од оваа сага, дали би сакале да откриете каде би се развивало дејството понатаму?
Е.Б: Имам необјавен ракопис за сликовница за деца, кој ми е целосно завршен уште од 2019 година. А во моментот го пишувам вториот дел од „Сонцето под земја, кралството над него“. Сè уште е рано да ви откријам детали, но можам да кажам дека ќе има повеќе хаос, повеќе акција и повеќе солзи во вториот дел – кој секако, нема да биде последен во серијалот.
