Активен живот со високи психофизички и ментални перформанси

Опис

Живееме во време на дигитализација, автоматизација, индустријализација, хемизација, механизација и урбанизација, во време на сообраќаен метеж, неподнослива врева, големи финансиски проблеми, неправди, махинации и малверзации. Се бориме и битисуваме за да успешно им се спротивставиме на сите секојдневни стресни состојби, психози и неврози. Егзистираме во време на недоволна, неправилна и нездрава исхрана, време на пороци, време на „робување” на безброј лоши навики и тешко прифаќање на позитивни промени и, пред  сѐ  и над сѐ, во време на недоволна физичка активност.

Животот може да се живее активно или пасивно. Не постои трет начин на живеење! Секој има право на избор! Одберете: редовни прошетки, брзо одење или лесно трчање во природа или пак, одење и трчање по аптеките и болниците (по скапи лекови на позитивна листа до коишто тешко се доаѓа или на закажани, откажани, презакажани, редовни, вонредни, контролни, специјалистички и други прегледи).

Кога е во прашање животот, сами по себе ни се наметнуваат прашања што заслужуваат сериозни одговори:

Како да се сочува и подобри здравјето?

Имаме ли јасна цел за доживотно прифаќање и аплицирање на нашата омилена рекреативна активност (подготвени ли сме редовно да пливаме, да пешачиме, да излегуваме во природа, да возиме велосипед, да играме мал фудбал, тенис, одбојка, кошарка или бадминтон, т.е. пасивниот начин на живеење да го замениме со активен)?

По кој пат да продолжиме: да потклекнеме и да се помириме со своите здравствени проблеми, да живееме со слабо и сериозно нарушено здравје, да не можеме да ги доброиме нашите боледувања, да прифатиме неодговорно, забрзано и рамнодушно да (од)умираме или инспиративно, со одушевување и силна волја редовно да рекреираме и квалитетно да живееме?!

Активниот метод на живеење е „учителот” од кој најмногу можеме да научиме.

Не чекајте пасивниот живот да ве дотера до ѕид, да ве седне на тенка гранка што лесно се крши! Продолжувањето на пасивниот живот води кон тешка или неизлечива болест. Одењето по линијата на помал отпор е самопродолжување на декадентниот и пасивен живот.

Здравата популација е најголемото богатство што може да го има секоја земја во светот.

На здравиот човек секој ден му е празник и здравјето за него е најголемиот можен дар.