Рецензија од прв читател: Ангела за „Сѐ што правиме во мракот“ од Џенифер Хилиер

 

 

„Сѐ што правиме во мракот“ е трета преведена книга од Џенифер Хилиер. Како и во претходните нејзини книги „Срца од цимет“ и „Мали тајни“, Хилиер останува верна на нејзината способност за градење напнатост од самиот почеток на книгата.

На сите нѝ е позната таа приказна кога едниот партнер е пронајден мртов и сомнежот неизбежно паѓа врз преживеаниот партнер. Приказна стара колку и времето нели? Но, Хилиер и овој навидум класичен пример го носи на едно повисоко ниво што претставува вистинска читачка гозба за сите љубители на психолошките трилери. Авторката вешто гради комплексна мрежа од тајни, лаги, неочекувани пресврти и неизвесност до самиот крај, што резултира во наратив кој е истовремено вознемирувачки и примамлив.
„Сѐ што правиме во мракот“ е психолошки трилер кој буквално ќе си игра со вас, предизвикувајќи бран од емоции. Ликовите се одлично разработени на начин што нема да ви биде тешко да се поврзете со нив.

Со секое поглавје неизвесноста и напнатоста расте, ќе се соочите со мрачните тајни на ликовите, а секој лик се бори со свои демони и желби, замаглувајќи ги границите помеѓу жртва и сторител. Оваа сива зона додава длабочина на приказната, што дури ќе ве принуди да ги преиспитате сопствените размислувања и поими за правда. Нема да можете да ги оправдате, но сепак ќе се фатите себеси дека всушност сочувствувате со нив и размислувате за нивните мотиви. Темите на вината, откупувањето и заматените линии помеѓу доброто и злото се испреплетени низ наративот. Со сето ова Хилиер ги поттикнува читателите да размислат за изборите што ги прават ликовите кога ќе се соочат со етички дилеми, оставајќи нè да се запрашаме што би направиле ние ако се ставиме на нивно место.

Хилиер храбро потонува во најмрачните агли на човечката природа, опсесијата, манипулацијата, до каде е човек спремен да оди за да го добие она што толку нездраво го посакува и крајните последици од одредени постапки кои кога тогаш ќе пристигнат, бидејќи никој не успеал да побегне од работите што ги направил, колку и да се кае. Оваа книга е таков психолошки трилер кој ги тестира границите на моралот и ќе ве принуди да преиспитате сè што мислевте дека знаете за човечкиот ум тогаш кога ќе застрани од вообичаениот пат и влегува во застрашувачките длабочини  на мрачните места.

 

Пишува: Ангела Божиновска