Среќен роденден, Ирса Сигурдардотир
Денеска, 24 август, ѝ е роденден на исландската писателка Ирса Сигурдардотир. Таа ѝ е позната на македонската публика од 2017 година кога издавачката куќа „Антолог“ го издаде првиот од серијата криминалистички трилер-романи со Дора Гудмундсдотир, „Последниот ритуал“.
Интересот на нејзините романи растеше и, набрзо потоа, истата година од печат излезе и вториот роман од оваа серија, „Украдени души“.
Минатата година со поддршка на Исландскиот центар за литература беа објавени и романите „ДНК“, „Пресметка“ и „Ослободување“, сите три дел од познатиот серијал насловен „Детската куќа“.
Во очекување на најновото остварување на Ирса Сигурдардотир, уште едно продолжение од овој серијал под наслов „Карпа на бесилките“, кое ќе излезе до крајот на оваа година, да се потсетиме на книгите што веќе ги имаме достапни на македонски.
Последниот ритуал
На универзитетот во Рејкјавик е пронајден машки труп со извадени очи и со чудни симболи исцртани на неговите гради. Полицијата не губи време и почнува да апси. Но семејството на германскиот студент не е убедено дека е фатен вистинскиот човек. Затоа, ја најмува Дора Гудмундсдотир, секси-адвокатка и самохрана мајка на две деца, да го истражи случајот. Набргу потоа Дора и адвокатот на семејството откриваат дека починатиот студент бил опседнат со исландската историја на лов на вештерки, тортури и јавни погубувања. Откриваат и слични современи застрашувачки настани, скриени под долгата и студена сенка на мрачните традиции. За двајцата вџашени истражувачи одеднаш ништо веќе не е како што изгледа. И никому не може да му се верува.
Украдени души
Зимата 1945 година. Четиригодишно девојче е затворено во чуден отвор во дворот на својата куќа. Како овој настан, шеесетина години подоцна, во 2006 година, е поврзан со две свирепи убиства – игли во стапалата на телата, детски плач што се слуша во маглата, коски во скриениот бункер за јаглен? Клиентот на адвокатката Дора Гудмунсдотир сака да ги тужи претходните сопственици на земјиштето на кое се наоѓа неговиот хотел, за кое тврди дека е опседнато од духови. Не верувајќи во натприродни сили, Дора оди во посета на неговиот „њу ејџ“ хотел на полуостровот Снајфелснес. Таму, таа и нејзиниот љубовник Матијас стануваат сведоци на една мистерија. Архитектката што работела за сопственикот на хотелот е брутално силувана и убиена. Тој е обвинет. Два дена подоцна, убиен е уште еден човек. Во обид да го расветли случајот, Дора влегува во заплетканата историја на семејството на двајцата браќа што живееле на имотот. Растргната помеѓу нивната и сопствената семејна приказна, во која таа е самохрана мајка на четиригодишна ќерка и на шеснаесетгодишен син што наскоро треба да стане татко, Дора не се откажува од расветлувањето на случајот. Возбудлив трилер сместен во карпестите исландски пејзажи.
ДНК
Прва книга од серијата „Детската куќа“! Мрачна и тажна приказна што започнува во 1987 година, кога три дечиња остануваат сираци и се разделени во три различни семејства. Како оваа приказна подоцна се поврзува со настаните што се случуваат во 2015 година, кога две момчиња бараат помош од соседите затоа што се будат заклучени во својата соба, а мајка им ја нема? Има причина за тоа – таа е мртва. Убиена е на грозоморен начин, а единствениот сведок на убиството е девојчето скриено под креветот, нејзината ќерка, која не можат да ја натераат да зборува. Каков ќе биде животот на тоа дете кога ќе биде во грижата на Фреја, психологинка во „Детската куќа“, која работи со трауматизирани и злоупотребувани деца? Но убиецот не застанува тука!
Пресметка
Малата Вака седи на студените скали пред своето ново училиште. Родителите веројатно заборавиле да ја земат. Немајќи избор, останува на скалите да чека. Но не е сама. Ѝ се придружува девојче од нејзиното одделение, кое веднаш го препознава поради необичната појава: му недостигаат два прста на едната рака. Девојчето дава предлог. Вака да го искористи телефонот во домот на девојчето, а потоа ќе одат да си играат во собата на Вака. Но, откако ќе влезе во нивната куќа, веќе никогаш нема да излезе.
Ослободување
Брилијантна и неизвесна приказна за мрачната страна на друштвените медиуми. Книгата ќе те натера да се запрашаш дали си објавил нешто за што можеби ќе зажалиш. Полицијата дознава за злосторството на ист начин како и сите други: преку „Снепчет“. На видеото е прикажана преплашена млада девојка што моли за прошка. Кога е пронајдено нејзиното тело, тоа е обележано со бројот 2. Детективот Хулдар се приклучува кон истрагата, доведувајќи ја во тимот детската психологинка Фреја за да помогне при испрашувањето на пријателите на убиената тинејџерка. Наскоро ќе дознаат дека Стела била далеку од оној ангел како што сите ја опишуваат, но кој би можел да ја мрази толку многу за да ја убие? Потоа, исчезнува уште еден тинејџер, нови видеа се испратени по друштвените мрежи и се појавува тело со бројот 3. Вистината е далеку од едноставна. Фреја и Хулдар се согласуваат дека убиецот сè уште не завршил. Но дали некаде постои неоткриено тело обележано со бројот 1?
