Убиство во библиотеката

Оваа книга ги има сите состојки потребни за уживање во едно детективско четиво: убиство, истражител, убиец, жртва. По една ноќ на која не се сеќава ништо, новинарот Андреј Младин наоѓа труп во својата библиотека. Не може да сфати како безживотното тело се нашло таму или кои се луѓето што учествувале во оваа збрка, по која се уништени дел од неговите записи, ниту пак како теговите (кои главно ги користел за да ги импресионира гостинките) се претвориле во оружје. Младин ја отфрла улогата на осомничен и решава да стане детектив. Првиот чекор што го презема е навраќање на минатото, за кое не знае дали ќе го расветли убиството, но барем ќе се присети како го сретнал Валентин, кого подоцна ќе го пронајде мртов во работната соба.

Стилот на Џорџе Арион се карактеризира со постојано напнат ритам, кратки реченици, богат јазик, силна доза на хумор и со извонредна иронија. Го споредуваат со Рејмонд Чендлер. Убиство во библиотеката е класик на романската книжевност, напишан за време на диктатурата на Чаушеску, и умешно дава критички поглед на своето време. Истоимениот филм е од 1992 година.