Европа во сепија

„Европа во сепија“ е збирка есеи на познатата хрватска книжевничка Дубравка Угрешиќ. Триесетина есеи во кои авторката секогаш поаѓа од некое сопствено искуство, скица, настан, сеќавање, односи, но првенствено од емоциите. Автобиографски и дневнички записи што се протегаат низ целиот свет – Њујорк, Хонг Конг, Бали, Амстердам, Загреб – и со црнохуморен тоналитет го разоткриваат апсурдот на современиот живот! Прислушувајќи што зборуваат луѓето во бистроата, на книжевните трибини; опишува средби, многу тажни, но и смешни ситуации. Всушност, најчесто истовремено смешни и тажни.

Потребен е странец за да видиме колку е мрачен овој свет, а Дубравка Угрешиќ е тој странец. Нејзиното пишување е грациозно и страсно, но ги задржува необичноста и хуморот што го прават бескрајно интригантно. Скалпелот на Угрешиќ засекува премногу длабоко во најболните општествени теми.

Дубравка Угрешиќ е добитник на наградата „Жан Амери“ за исклучителни достигнувања во областа на есеистиката во 2012 година, а следната година од своите есеи ја составува оваа книга.