Опис
Моите три први објавени книги пишувани се во три града (Белград, Скопје, Париз, па пак Скопје) во периодот на една ослободена, независна книжевна и културна сцена полна со експериментирање, бунт и упорни исчекори, отклони од воспоставените норми. Крајот на седумдесеттите и почетокот на осумдесеттите беше време со силен манифестен енергетски поттик во соочувањата со големите промени во надворешниот и внатрешниот свет, кога во литературата, како и во музиката, ликовните уметности, театарот, филмот, сродниците се здружуваа, провоцираа, водеа дебати, полемики, но и создаваа вредни остварувања, под очигледно влијание на постмодерната поетика.
Тој дух на времето го чувствувам веќе од инвентивните корици на „Младиот мајстор на играта“ (фотографии: Роберт Јаки) и „…или…“ (цртежи: Диано Здравковиќ), двете во издание на „Млад Борец“, што во тие години беше стожерно списание во промовирањето на новите креативни постигања. Рецензентки на „…или…“ се Јадранка Владова и Елизабета Шелева, најблиски сопатнички од Петтиот круг (рецензентите, пак, на првенецот „Младиот мајстор“, Слободан Мицковиќ и Душко Наневски, писатели со богати авторски и човечки доблести, многу ми помогнаа во тогашниот период на тешки животни премрежиња).
Ако треба на некој начин да ја одделам заемната поврзаност кај трите книги во испреплетеноста на стварното и фиктивното низ куси раскажувачки форми, тогаш: минијатурите во „Младиот мајстор на играта“ се најблиски до наративните поетски прози, „…или…“ со долги импулсивни реченици што почнуваат и завршуваат со три точки, се експресивно дејствувачки фрагменти, во „Пловидба кон југ“ композициската постапка резултира кон создавање „вистински“ раскази.
Особена благодарност кон книгоиздателството „Антолог“ за неговата понуда да ги преиздаде овие три книги, неизбежни во возбудливото патешествие на моето писателско самоспознание.
Рецензии
Сѐ уште нема мислења