Портрети со зборови

„Портрети со зборови“ е книжевно портретирање проткаено со филозофски промислувања.

Голем дел од темите за кои се говори се иманентно филозофски: смислата, убавината, слободата, љубовта, должноста, одговорноста, вредностите, болката, радоста, страдањето, творештвото, итн. Симболичното во делото е присутно на повеќе начини во зависност од ликовите и темите за кои расправаат. Нештата понекогаш се едноставни и така треба да бидат кажани, но постојат нешта во животот чија комплексност и богатство бараат опширни (раз)говори. Крајната инстанца на дијалозите е да се дојде до разбирање и на себе и на другиот бидејќи така се напредува квалитативно во живеењето. Оттука, во раскажувачкиот процес, очигледни се слоевитоста и згуснатоста на и во изразот на делото.

По структура, книгата е составена од покуси и подолги раскази. Централен елемент се портретите, односно „портретирањето со зборови“. Портретирањата се и директни и индиректни, а комплексноста на внатрешните состојби на ликовите се увидува пред сѐ од темите, но и од начинот на кој се изнесени.