Се буди ѕверот

Теофил Плашки е млад и успешен бизнисмен, неоженет, но со голем број авантури. Станува фобичен дека го следи кампионет со натрапници што планираат да му го украдат скапиот џип. Фобија повеќе: настојчиво му се заканува некој непознат средовечен човек, обвинувајќи го дека забременил млада девојка и дека за тоа ќе сноси последици. Драган Дарко, пак, е градежен работник со сон да ја зграпчи првата шанса и да стане бизнисмен ковач на сопствената среќа. Теофил и Драган се среќаваат преку мала бизарна кавга, но конфликтот наскоро прераснува во пријателство. Плашки му нуди на Дарко почетен капитал да отвори сопствена фирма. Овој прифаќа…

Телеграфски пренесена, ова е фабуларната оска на најновата, 35-та книга на Велко Неделковски. Приказна што се случува ОВДЕ и СЕГА, во современиот општествен вриеж, своевидна сага за животот на неколку наши (пост)транзициски фамилии. Раскажувајќи со филмски набој, но и со трилер-нијансирање на нарацијата и на ликовите, авторот нè воведува во свет на противречности, каде што постепено се буди ѕверот на себичноста, нетолеранцијата, одмаздољубивоста, бесчувствителноста кон другите, алчноста. Со модерен книжевен израз и со изграден стил, во избалансиран однос меѓу епското, лирското, драмското и ироничното, Неделковски раскажува трагикомична полифонична приказна за нашето опстојување на овие простори.