М-р Жарко Кујунџиски (Скопје, 1980) е македонски романсиер, есеист, драмски автор, раскажувач, поет, филмски и книжевен критичар, преведувач и издавач.

Роден е на 19 мај 1980 година во Скопје. Дипломирал во 2003, а во 2009 и магистрирал на катедрата за Општа и компаративна книжевност на Филолошкиот факултет „Блаже Конески“, стекнувајќи се со титулата магистер по филолошки науки. Соработува со „Антолог“ од 2005 година, а од 2010 година е главен и одговорен уредник. Во своето портфолио има над петстотини уредени изданија само за „Антолог“.

Бил колумнист во дневните весници „Утрински весник“ и „Дневник“, копирајтер во маркетинг-агенција, прес-координатор на Филмскиот фестивал „Браќа Манаки“ од Битола. Се пројавува како основач и иницијатор, самостојно или партнерски, на повеќе релеватни проекти во македонската културна средина како: електронското списание „Репер“ (www.reper.net.mk), наградата за најдобар превод „Драги“, интернационалниот книжевен фестивал „BookStar“ (www.bookstar.mk), фелоушип програмата „Објавувајќи ја Европа“, мобилната книжарница „Зборче“, како и на онлајн платформата за промоција на македонската литература во странство www.writers.mk.

Автор е на 14 книги, како и на водичот „Скопје“ (2015) во склоп на проектот „Откривајќи ја одново Европа“ на Little Global Cities. Превел и адаптирал на македонски јазик неколку дела од англиски на македонски јазик.

Негови дела се преведени на англиски, српски, хрватски, словенечки, полски, германски, турски, бугарски, италијански, украински, арапски и на албански јазик. Застапен е во огромен број антологии на македонската проза и поезија. Меѓу другото, неговиот расказ „Кога се губат очилата“ е дел од реномираната антологија „The Best European Fiction 2013“.

Добитник е на наградите „DeBuren“, „13 Ноември“, „11 март 1943“, „Бели мугри“, „Студентски збор“, „Блаже Конески“ за есеј, како и на награди за сценарио и глума на Фестивалот „Лица без маски“. Бил македонски кандидат за наградата „Балканика“ 2021.

Член е на Друштвото на писателите на Македонија од 2012 и на македонскиот ПЕН-центар од 2013 година.

Приредувач е на „Јас имам сон“ (2010), антологија на најзначајните светски и македонски говори на сите времиња и на „Дај две, љубовни!“ (2015), антологија на љубовни песни од автори од Европа.

Редовен учесник е на панел дискусии, промоции, книжевни читања, фестивали и резиденцијални престои. Остварил и огромен број телевизиски и радио гостувања, а редовно присутен е и во останатите медиумите, со интервјуа и ставови за различни прашања.

Романот „Spectator“ е прв дебитантски роман во современата македонска книжевност со осум изданија и досега е преведен на полски и на англиски јазик. Романот „Америка“ е преведен на италијански јазик, додека „Сфинга на гневот“ е преведен на албански и на бугарски јазик, а се преведува и на чешки јазик.

 

Авторски книги:

1. Жарко Кујунџиски, Spectator (Антолог 2003)
2. Жарко Кујунџиски, Ендрју, љубов и други непогоди (Антолог 2004)
3. Жарко Кујунџиски, Америка (Антолог 2006)
4. Жарко Кујунџиски, Најдено-загубено (Антолог 2008)
5. Жарко Кујунџиски, Сузан (под името Џеси Блејз, Антолог 2008)
6. Жарко Кујунџиски, 13 (Антолог 2010)
7. Жарко Кујунџиски, Мојата Сузан повторно девојка (Дом на културата Кочо Рацин 2011)
8. Жарко Кујунџиски, Најкраткото долго (Антолог 2012)
9. Жарко Кујунџиски, Скопје и сè е можно (Антолог 2013)
10. Жарко Кујунџиски, Тино од мојот влез (Антолог 2015)
11. Жарко Кујунџиски, Ние предметите (Антолог 2016)
12. Жарко Кујунџиски, Сфинга на гневот (Антолог 2020)
13. Жарко Кујунџиски, Новите авантури на Тино од мојот влез (Антолог 2021)
14. Жарко Кујунџиски, Приказничар (Антолог 2024)

 

Приредил:

1. „Јас имам сон“ – антологија на најславните говори на сите времиња од светот и од Македонија (Антолог 2010)
2. „Дај две, љубовни!“ –антологија на љубовни песни од автори од Европа (Антолог 2015).

 

Преводи:

1. Труман Капоти, „Појадок кај Тифани“ (Антолог 2006)
2. Квентин Тарантино и Роџер Евари, „Евтини приказни“ (Антолог 2008, со Златко Кујунџиски)
3. Марк Јансен, „Островце“ (Антолог 2021)
4. Линде Фас, „Детето и китот“ (Антолог 2021)
5. Марк Јансен, „Диносауруси не постојат“ (Антолог 2022)
6. Сане те Лоу, „Ова е твое“ (Антолог 2023)