Пропаганда

Четвртата по ред поетска збирка од Емил Калешковски, насловена „Пропаганда (омаж на заменките)“, е составена од три раздели со вкупно триесет и три песни, факт што упатува на длабокиот симболички и метафоричен полнеж избликнат од ова пеење (само божественото име Елохим се појавува 33 пати во книгата Битие).

Поезијата на Калешковски се движи во апсурдни семантички координати со жестока иронија и сарказам кон сè што претставува (лажен) авторитет и (сомнителна) веродостојност. Оваа поетска материја сè повеќе се разигрува и се отвора кон нови насоки. Воведува фусноти и цитати, математички формули и графикони, ликовни елементи и заграби од стихови од претходните книги. Игра возбудлива поетска криенка, воведува стапици за инертните читателски духови, симулира сопствени превиди, погрешки и сопки.