„Чекорите до црешовото дрво“ и „Невидлив“ на Брајово писмо донирани во Националната универзитетска библиотека „Св. Климент Охридски“

 

Кога се зборува за убавиот пишан збор, важно е да се спомене дека неговата достапност е една од неговите најважни карактеристики. Секое литературно дело треба да е достапно до читателот на начин на кој е најлесно достапен за него. Вистинската вредност на книгите е во нивната достапност – во можноста секој читател, без разлика на предизвиците, да може да ја доживее магијата на раскажаните приказни.

 

Како дел од инклузивната програма на „Антолог“, неодамна издадовме два наслови од нашата едиција „Бранови“, кои сега се достапни на Брајово писмо. Книгите се комплетно адаптирани за лица со оштетен вид, во формат на кој најмногу им одговара. Се одлучивме да одбереме книги кои ќе одговараат за деца на повеќе возрасти, па така ги избравме насловите „Чекорите до црешовото дрво“ од Паола Перети, која е авторка со оштетен вид, и едно од делата на новиот Гинисов рекордер Елој Морено – „Невидлив“.

 

Оваа иницијатива, како нов момент во инклузивната програма на „Антолог“, подразбираше дека овие книги нема да да бидат достапни за продажба, туку ќе се донираат за институции каде што се најпотребни. Претставници од издавачката куќа лично се сретнаа со претставници на институциите за да им ги достават книгите.

 

Примероци од „Чекорите до црешовото дрво“ и „Невидлив“ на Брајово писмо беа донирани во Националната универзитетска библиотека „Св. Климент Охридски“.

 

„Чекорите до црешовото дрво“ од Паола Перети е дело од авторка која и самата се соочува со предизвиците на живеење живот со оштетен вид. Авторката страда од Старгардова болест за која сè уште не постои лек. Болеста го погодува сетилото за вид со краен ефект до целосно слепило. Во својата книга „Чекорите до црешовото дрво“ ја раскажува приказната за Мафалда, девојче на кое му ја откриваат истата болест.

                     

„Невидлив“ од Елој Морено е приказна за едно дете кое, раководејќи се од најлошиот советник – стравот, посакува да има супермоќи како суперхероите од стриповите што ги чита. Го прави тоа за да се спаси од насилството што го трпи од соучениците. Невидлив е приказна раскажана низ призмата на насилникот и жртвата, неговата симпатија и пријателите, родителите и наставниците, и е поучна за сите што ќе ја прочитаат.

 

Оваа иницијатива е дел од проектот „Создадено во Европа“, ја истакнува мисијата на „Антолог“ – да ја направи книжевноста достапна за сите и да поттикне рамноправен пристап до културните содржини.

Изданијата од „Чекорите до црешовото дрво“ и „Невидлив“ на Брајово писмо не се достапни за продажба. Тие може да се најдат исклучиво во институциите каде што се донирани – Државното училиште за деца и младинци со оштетен вид „Димитар Влахов“ – Скопје, Националната универзитетска библиотека „Св. Климент Охридски“ и Градската библиотека „Браќа Миладиновци“ – Скопје.