Сериска адаптација на култниот книжевен серијал „Детската куќа“ наскоро на малите екрани

Литературната сага проткаена со морничави настани, мистериозни убиства и испреплетени животни приказни од далечниот север, наскоро ќе биде достапна на екраните на верните следачи на делото од Ирса Сигурдардотир.

Имено, тимот на авторката официјално ја најави серијата „Рејкјавик 112“, која овој април ќе ја има својата премиера во Исланд. Настаните во серијата се базирани на настаните од литературниот серијал „Детската куќа“ кој започнува со делото „ДНК“.

Сагата за детективот Хулдар и психологот Фреја и нивните професионални и приватни предизвици ќе може да се следи во 6 епизоди. Серијата е во продукција на „Њу Медиа Арк“ и „ndF“ кои нудат нов и модерен осврт на крими-трилер жанрот.

 

Првичната најава за екранизацијата воведува во приказна каде „жена е брутално убиена пред својата млада ќерка, која е единстваниот сведок на убиството. Грозоморниот случај е предаден во рацете на детективот Хулдар, кој се мачи да одгатне мистични докази и истрауматизирано девојче кое поради траумата станало немо. Со цел да ги пробуди спомените на девојчето, Хулдар во истрагата вклучува помош од детски психолог. На негово изненадување се појавува Фреја, девојка со која тој неодамна имал чудно рандеву. Приморани да соработуваат, Фреја и Хулдар се во трка со времето да фатат убиец кој се чини дека опасно стапува во чекор со истрагата.“

Впечатливоста на нордискиот ноар со своите мистични заплети и впечатливи ликови стана еден од омилените жанрови на модерното време. Една од најрепрезентативните авторки на жанрот – Ирса Сигурдардотир продаде повеќе од 2,5 милиони примероци од овој серијал, на читатели во 25 земји кои по читањето останаа „скаменети“.

Љубопитните читатели нетрпеливо очекуваат новости за „Рејкјавик 112“. По својата премиера, серијата ќе биде достапна и за интернационалната публика.